ধুবুৰী,4 ডিচেম্বৰ : দক্ষিণ শালমাৰা মানকাচৰ জিলাৰ কালাপানী উপ স্বাস্থ্য কেন্দ্ৰৰ চিকিৎসক আৰু নাৰ্চৰ আবাসগৃহ নির্মাণৰ নামত গাফিলতিৰ অভিযোগ উত্থাপন ৷ 2016 চনত আৰম্ভ হোৱা এই কাম ঠিকাদাৰে আজি পৰ্যন্ত সম্পূৰ্ণ নকৰাৰ অভিযোগ উত্থাপন কৰিছে দক্ষিণ শালমাৰা মানকাচৰ জিলা ছাত্ৰ সন্থাৰ লগতে স্থানীয় ৰাইজে ৷
মানকাচৰৰ পূৰ্বাঞ্চলৰ একমাত্ৰ উপ স্বাস্থ্য কেন্দ্ৰ কালাপানী উপ স্বাস্থ্য কেন্দ্ৰটোৰ আবাসগৃহৰ বিগত চাৰিটা বছৰে কাম কৰি আছে মানকাচৰ সমষ্টিৰ প্ৰাক্তন জলসিঞ্চন মন্ত্ৰী জহিৰুল ইছলামৰ পুত্ৰ গালিব ইছলামে ৷ জানিব পৰা মতে, গালিব ইছলামে চাৰি বছৰ পূৰ্বে কালাপানী উপ স্বাস্থ্য কেন্দ্ৰৰ চিকিৎসক আৰু নাৰ্চৰ আবাস নিৰ্মাণৰ ঠিকা লাভ কৰিছিল ৷ কিন্তু পৰিতাপৰ বিষয় এয়ে যে, ঠিকাদাৰ গালিব ইছলামে লেহেমীয়া গতিত কাম কৰাৰ বাবে আজিলৈকে সম্পূৰ্ণ নহ’ল স্বাস্থ্য কেন্দ্ৰটোৰ নিৰ্মাণৰ কাম ৷
এইক্ষেত্ৰত স্বাস্থ্য় বিভাগে নীৰৱ ভুমিকা পালন কৰাৰ অভিযোগ উত্থাপন কৰাৰ লগতে ঠিকাদাৰজনৰ কামৰ প্ৰতি সন্দেহ প্ৰকাশ কৰে জিলা আছুৰ সভাপতি ফিৰোজ আলফাৰুক খন্দকাৰে ৷ ইয়াৰোপৰি নিৰ্মাণৰ কামৰ ক্ষেত্ৰত নাম ফলক নথকাৰ লগতে চাৰিওফালে বাঁহৰ বেৰ দি গোপনে মানুহে যাতে দেখিব নোৱাৰে তেনে অৱস্থাতে কাম কৰি থকা পৰিলক্ষিত হৈছে ৷
গতিকে শীঘ্ৰেই কামখিনিৰ তদন্ত কৰি সঠিকৰূপে উপ স্বাস্থ্য কেন্দ্ৰটোৰ আবাসগৃহ নিৰ্মাণৰ কাম সমাপ্ত কৰিব লাগে বুলি চৰকাৰ তথা জিলা প্ৰশাসনক আহ্বান জনায় জিলা আছুৱে ৷
লগতে পঢ়ক : ডুমডুমাত শোকাৱহ পথ দুৰ্ঘটনা : নিহত 2
