ধুবুৰী,21 মে': আন্তৰ্জাতিক চাহ দিৱস ৷ আজি সমগ্ৰ বিশ্বতে পালন কৰা হ'ল আন্তৰ্জাতিক চাহ দিৱস ৷ অসমতো ক'ভিডৰ ভয়াৱহতা প্ৰতি লক্ষ্য ৰাখি প্ৰশাসনে জাৰি কৰা কঠোৰ প্ৰট’কলৰ মাজত অনুষ্টুপীয়াকৈ পালন কৰা হয় আন্তৰ্জাতিক চাহ দিৱস ৷
বৰ্তমানে সমগ্ৰ বিশ্বজুৰি বৃদ্ধি পোৱা চাহৰ চাহিদাই অৰ্থনীতিৰ ক্ষেত্ৰখনত এক উল্লেখনীয় প্ৰভাৱ পেলাইছে ৷ চাহ উৎপাদনৰ ক্ষেত্ৰত এক বিশেষ ভূমিকা পালন কৰি আহিছে অসমে ৷ চাহৰ গুণাগুণ, স্বাস্থ্যজনিত উপকাৰিতাই বৰ্তমান সময়ত ইয়াৰ চাহিদা বহু পৰিমাণে বৃদ্ধি কৰিছে ৷ বিগত সময়ত অসমৰ চাহে আন্তৰ্জাতিক বজাৰতো বিশেষভাৱে প্ৰভাৱ বিস্তাৰ কৰিবলৈ সক্ষম হৈছে, যদিও বৰ্তমানৰ ক'ভিড সৃষ্ট পৰিৱেশৰ বাবে অসমৰ উদ্যোগত এক অভাৱনীয় পৰিস্থিতি উদ্ভৱ হৈছে ৷ অসমৰ ক্ষুদ্ৰ চাহ খেতিয়কসকলৰ ক্ষেত্ৰত বজাৰ অভাৱ পৰিলক্ষিত হৈছে ৷
যি কি নহওঁক চাহৰ উৎপাদন বৃদ্ধিৰ বাবে প্ৰয়োজনীয় বিভিন্ন কাৰ্যপন্থা হাতত লোৱাৰ লগতে চাহৰ ঐতিহাসিক মহত্ব আৰু ইতিহাসৰ বিষয়ে জন সচেতনতা বৃদ্ধিৰ লক্ষৰে আন্তৰ্জাতিকভাৱে উদযাপন কৰা হয় আন্তৰ্জাতিক চাহ দিৱস ৷ বিশ্বত চাহে পেলোৱা গভীৰ সংস্কৃতিক আৰু অৰ্থনৈতিক প্ৰভাৱৰ বিষয়ে ৰাইজক অৱগত কৰা উদ্দেশ্যেৰে আন্তৰ্জাতিক চাহ দিৱস প্ৰতি বছৰে ২১ মে' তাৰিখে সমগ্ৰ বিশ্বজুৰি উদযাপন কৰা হয় ।
2020 চনৰ 21 মে'ত সমগ্ৰ বিশ্বতে প্ৰথমবাৰৰ বাবে আন্তৰ্জাতিকভাৱে পালন কৰা হয় চাহ দিৱস ৷ উল্লেখ্য যে, 2005 চনৰ 15 ডিচেম্বৰত নতুন দিল্লীত প্ৰথম চাহ দিৱস উদযাপন কৰা হৈছিল ৷ কিন্তু চাহৰ গুণাগুণ আৰু ইয়াৰ সাংস্কৃতিক আৰু অৰ্থনৈতিক প্ৰভাৱৰ বাবেই international food and agriculture organization চমুকৈ FAO ৰ অনুমোদন সাপেক্ষে ৰাষ্ট্ৰসংঘৰ নিৰ্দেশ অনুযায়ী 2020 চনৰ 21 মে'ত আন্তৰ্জাতিকভাৱে পালন কৰা হয় চাহ দিৱস ৷
লগতে পঢ়ক: মুগা পালনেৰে সোণসেৰীয়া সপোন ৰচিছে এদল মহিলাই
