ধুবুৰী,২৩জুন : ধুবুৰী জিলাৰ অসম বংগ সীমান্তৰ ছোটোগুমাত ভয়ংকৰ ঘটনা । অষ্টম শ্ৰেণীৰ ছাত্ৰীক ধৰ্ষণৰ চেষ্টা এজন লোকৰ ।
২১ জুনৰ বিয়লি পাচ বজাত টিউচন কৰি ঘৰলৈ উভতি আহিছিল ছোটোগুমাৰ এগৰাকী কিশোৰী । সেই সময়তে পথৰ কাষৰ বাঁহনিত লুকাই থকা বেল্লাল হোসেন নামৰ এজন লোকে কিশোৰীগৰাকীক চোচৰাই নিয়ে বাঁহনিৰ মাজলৈ । পাশণ্ড বেল্লালে ধৰ্ষণৰ চেষ্টা চলোৱাত চিঞৰ-বাখৰ কৰে কিশোৰীগৰাকীয়ে । কিশোৰীগৰাকীক চিঞৰ-বাখৰ নকৰিবলৈ মাৰপিট কৰাৰ লগতে ডিঙি চেপি হত্যাৰো চেষ্টা চলায় বেল্লালে । ইফালে, কিশোৰীগৰাকীৰ চিঞৰ-বাখৰ শুনি স্থানীয় ৰাইজ ঘটনাস্থলীত উপস্থিত হয় । কিন্তু কিশোৰীগৰাকীক অচেতন অৱস্থাত পেলাই বাইক লৈ পলায়ন কৰে ধৃত বেল্লালে ।
এই ঘটনাৰ পাছতে ধৃত বেল্লালৰ পত্নী তথা ছোটোগুমা গাঁও পঞ্চায়তৰ সদস্যা সাদেজা বিবি আৰু ভাতৃ দেলদাৰ হোসেনে আৰক্ষীক গোচৰ নিদিবলৈ ধনৰ প্ৰলোভন দিয়ে কিশোৰীগৰাকীৰ পৰিয়ালক । পৰিয়ালৰ লোকে ধন লবলৈ অস্বীকাৰ কৰাত বেল্লালৰ পৰিয়ালৰ লগত কাজিয়াৰ সৃষ্টি হোৱাৰ লগতে কিশোৰীগৰাকীৰ পিতৃক লাঠিৰে আঘাত কৰে । এই সন্দৰ্ভত গোলকগঞ্জ থানাৰ অন্তৰ্গত ছোটোগুমা আৰক্ষী চকীত এজাহাৰ দাখিল কৰে পৰিয়ালৰ লোকে । কিন্তু আৰক্ষীয়ে বৰ্তমানলৈ অভিযুক্তক আটক কৰিবলৈ সক্ষম হোৱা নাই ।
