ধুবুৰী, 15 ছেপ্তেম্বৰ : ৰাজ্যৰ ভিন্ন প্ৰান্তৰ লগতে ধুবুৰী জিলাতো ক্ৰমাৎ ভয়াৱহ ৰূপ লৈছে মাৰাত্মক কৰণা ভাইৰাছে । জিলা খনত ইতিমধ্যেই প্ৰায় চাৰি সহস্ৰাধিক লোক ক'ৰণা ভাইৰাছত আক্ৰান্ত হোৱাৰ লগতে মৃত্যু হৈছে বাৰ জনকৈ ৰোগীৰ ৷ কিন্তু ইমানৰ পাছতো জিলাখনৰ অধিকাংশ লোকৰ মাজতে নাই কোনো সজাগতা তথা সাৱধানতা। মাস্ক পৰিধান নকৰাকৈয়ে সামাজিক দূৰত্ব উলংঘা কৰি জীৱন যাত্ৰা অব্যাহত ৰাখিছে ধুবুৰী জিলাৰ অধিকাংশ লোকে ৷ যাৰ বাবে এতিয়া নীতি-নিয়ম নমনা সকলৰ বিৰুদ্ধে অভিযান চলাবলৈ বাধ্য হৈছে ধুবুৰী আৰক্ষী ৷ বিগত দিন কেইটাত ধুবুৰী আৰক্ষীয়ে বিভিন্ন প্ৰান্তত অভিযান চলাই মাস্ক নিপিন্ধা লোকসকলৰ পৰা সংগ্ৰহ কৰিছে প্ৰায় পাঁচ লক্ষাধিক টকাৰ জৰিমনা ৷
উল্লেখ্য যে,যান বাহনত চলাচল কৰা যাত্ৰী সকলৰ লগতে ধুবুৰীত একাংশ চালকেও পৰিধান নকৰে মাস্ক ৷ ধুবুৰী জিলা আৰক্ষী অধীক্ষক আনন্দ মিশ্ৰই উল্লেখ কৰা মতে, জিলাখনত ৰাইজৰ মাজত এতিয়াও সজাগতাৰ অভাৱ আছে । গতিকে ৰাইজক সজাগতা অৱলম্বন কৰি,মাস্ক পৰিধান কৰি সামাজিক দূৰত্ব মানি চলিবলৈ আহ্বান জনাইছে ধুবুৰী জিলা আৰক্ষী অধীক্ষক আনন্দ মিশ্ৰই ৷
ইপিনে একাংশ চালকে ইচ্ছা কৰিয়েই মাস্ক পৰিধান নকৰা দৃষ্টিগোচৰ হোৱাৰ লগতে একাংশ চালকে ৰোগী কঢ়িয়াই লৈ ফুৰাৰ সময়তো মাস্ক পৰিধান নকৰা ঘটনাই ভৱাই তুলিছে সচেতন মহলৰ লগতে আৰক্ষী মহলকো ৷ উল্লেখ্য যে,ৰাইজৰ মাজত সজাগতা বৃদ্ধি নহলে অনাগত দিনকেইটাত কৰ'ণা ভাইৰাছে ভয়ংকৰ ৰূপ লোৱাৰ আশংকা কৰিছে সচেতন ৰাইজে ৷
লগতে পঢ়কঃ অৰুণাচল প্ৰদেশৰ মুখ্যমন্ত্ৰী পেমা খাণ্ডু কোভিড-১৯ত আক্ৰান্ত
