ধুবুৰী, ৩ এপ্ৰিলঃ মহামাৰী কৰ'ণা ভাইৰাছত ত্ৰাসত জৰ্জৰিত সমগ্ৰ বিশ্বৰ লগতে ভাৰতবৰ্ষও । দেশৰ সংকট কালত সকলোৱে এতিয়া সহায়ৰ হাত আগবঢ়াইছে চৰকাৰলৈ । কম বেছি পৰিমাণে সকলোৱে মুখ্যমন্ত্ৰী আৰু প্ৰধানমন্ত্ৰীৰ সাহায্য পুঁজিলৈ আগবঢ়াইছে নিজৰ সাঁচতীয়া ধন ।
এনে সময়তে এজন আৰক্ষী বিষয়াৰ কৰ্মই সকলোৰে মন চুই যাবলৈ সক্ষম হৈছে । দেশৰ প্ৰতি দায়িত্ববোধে সঁচাকৈয়ে গৌৰাম্বিত কৰিছে ৰাজ্যবাসীক । নিজৰ ৪ বছৰীয়া কন্যাৰ জন্মদিনত ঘৰলৈ যাব নোৱাৰিলেও পিতৃয়ে দাঙি ধৰিলে মানৱীয়তাৰ পৰিচয় ।
ধুবুৰী জিলাত কৰ্মৰত হৈ আছে জিলা উপ আৰক্ষী অধীক্ষ ত্ৰিনয়ন ভূঞা । আনহাতে দেশত এতিয়া চলি আছে লক্ ডাউন । সেই মৰ্মে এই সংকটৰ সময়ত নিষ্ঠাৰে নিজৰ কৰ্মত নিয়োজিত হৈ আছে উপ আৰক্ষী অধীক্ষগৰাকী । কিন্তু যোৱা ২ এপ্ৰিলত আছিল কণমানী কন্যাৰ চাৰিবছৰীয়া জন্মদিন । জন্মদিন বুলি কোলাত ডাঙি ধৰিবলৈ কণমানী জনী কাষত নাই । কাৰণ কৰ্মসূত্ৰে ঘৰৰ পৰা আঁতৰত থাকিবলগীয়া হৈছে পিতৃ । পিতৃ ধুবুৰীত থকাৰ বিপৰীতে মাতৃ-কন্যা আছে তেজপুৰত । ইয়াৰ লগতে আছে সংকটৰ সময়ত কৰ্মৰ প্ৰতি দায়িত্ববোধ । কাৰণ দেশত সম্পূৰ্ণ লক্ ডাউন । কিন্তু ৪ বছৰৰ কন্যাৰ জন্মদিন বুলিয়ে পিতৃয়ে দেশৰ সংকট কালত মুখ্যমন্ত্ৰীৰ সাহাৰ্য পুঁজিলৈ আগবঢ়ালে 40 হাজাৰ টকা ।
মহামাৰী ৰূপ ধাৰণ কৰা কৰ'ণা ভাইৰাছ তথা কোভিড-১৯ ক্ৰমাৎ ভয়াৱহ ৰূপ ধাৰণ কৰাৰ সময়তে ইয়াক প্ৰতিৰোধ কৰাৰ ক্ষেত্ৰত চৰকাৰে বিভিন্ন পদক্ষেপ গ্ৰহণ কৰিছে । আনহাতে চৰকাৰে লক্ ডাউন ঘোষণা কৰাৰ পিছতেই স্বাভাৱিকতে দেশত দেখা দিছে অৰ্থ সংকটে । এনে সময়তে চৰকাৰক সহায় কৰাৰ বাবে দেশৰ বিভিন্ন জনে আগবঢ়াইছে সহায়ৰ হাত । যিয়ে যিমান পাৰে বৰঙণি দিছে মুখ্যমন্ত্ৰী আৰু প্ৰধানমন্ত্ৰীৰ সাহায্য পুঁজি লৈ । সেই মৰ্মেই ধুবুৰীত কৰ্মৰত জিলা উপ আৰক্ষী অধীক্ষক ত্ৰিনয়ন ভূঞাই নিজ কন্যাৰ জন্ম দিনত 40 হাজাৰ টকা প্ৰদান কৰে মুখ্যমন্ত্ৰীৰ সাহায্য পুঁজিলৈ । উপ আৰক্ষী অধীক্ষকগৰাকীৰ এই মহানুভৱতাই সকলোৰে দৃষ্টি আকৰ্ষণ কৰিবলৈ সক্ষম হৈছে ।
মুঠৰ ওপৰত খাকী পোচাকৰ আঁৰত যে দ্বায়িত্ববোধৰ সমান্তৰালকৈ মানৱীয়তা লুকাই থাকে তাকেই পুনৰবাৰ প্ৰমাণ কৰিলে এইজন তেজপুৰৰ সন্তান তথা ধুবুৰী জিলা উপ আৰক্ষী অধীক্ষক ত্ৰিনয়ন ভূঞাই ।
