ধুবুৰী, 23 এপ্ৰিলঃ বুধবাৰে ধুবুৰীত উপস্থিত হয় ৰাজ্যৰ কৃষি মন্ত্ৰী অতুল বৰা আৰু যোগান মন্ত্ৰী ফণী ভূষণ চৌধুৰী ৷ ধুবুৰী জিলা উপায়ুক্তৰ কাৰ্যালয়ত জিলা প্ৰশাসনৰ সৈতে এক গুৰুত্বপূৰ্ণ বৈঠকত মিলিত হয় দুয়োগৰাকী মন্ত্ৰী ৷ বিশেষকৈ কৃষি খণ্ড আৰু খাদ্য সমস্যাৰ ক্ষেত্ৰত বিভিন্ন দিশ সামৰি লৈ বিভিন্ন দিশ সম্বন্ধে আলোচনা কৰা হয় এই বৈঠকত ৷ ইয়াৰ পিছতেই এক সংবাদমেল অনুষ্ঠিত কৰি ধুবুৰী জিলাত আগন্তক এমাহৰ খাদ্য সামগ্ৰী মজুত আছে বুলি মন্তব্য কৰে যোগান মন্ত্ৰী ফণী ভূষণ চৌধুৰীয়ে ৷ জিলাখনত কোনো ধৰণৰ খাদ্য সংকট নোহোৱা বুলি স্পষ্ট কৰি দিয়ে মন্ত্ৰী গৰাকীয়ে ৷ ইয়াৰ উপৰিও ধুবুৰীত ৰমজান মাহৰ বাবে প্ৰয়োজনীয় ফল-মূল আৰু খাদ্য সামগ্ৰীৰ যাতে অভাৱ নহয় তাৰ প্ৰতি দৃষ্টি ৰাখিবলৈ জিলা প্ৰশাসনক নিৰ্দেশ দিয়ে মন্ত্ৰী ফণী ভূষণ চৌধুৰীয়ে ।
আনহাতে, বৰ্তমান অৰ্থনৈতিক সংকটৰ ফলত চৰকাৰে ৰাজ্যত পেট্ৰ’ল,ডিজেল আদিৰ মূল্য বৃদ্ধি কৰাৰ দৰে সিদ্ধান্ত গ্ৰহণ কৰা বুলি ব্যক্ত কৰে যোগান মন্ত্ৰী ফণী ভূষণ চৌধুৰীয়ে ৷ ইয়াৰ উপৰিও ৰমজান আৰু লক ডাউনৰ গইনা লৈ কোনো ব্যৱসায়ীয়ে ইচ্ছাকৃতভাৱে সামগ্ৰীৰ মূল্যবৃদ্ধি কৰিলে জিলা প্ৰশাসনে ইয়াৰ বিৰুদ্ধে আইনী ব্যৱস্থা গ্ৰহণ কৰিব বুলি বুধবাৰৰ বৈঠকত সিদ্ধান্ত গ্ৰহণ কৰা হয় ৷
লগতে পঢ়ক-শিলচৰ জিলা কাৰাগাৰৰ ডিটেনশ্যন কেম্পৰ পৰা 16 জনক মুক্তি
