ধুবুৰী, 5 মাৰ্চ: অসম বিধান সভাৰ নিৰ্বাচনৰ দিন ঘোষণা কৰাৰ লগে লগে পূৰ্ণ গতিত প্ৰস্তুতি চলাইছে ধুবুৰী জিলা প্ৰশাসনে ৷ ধুবুৰী জিলা উপায়ুক্ত দেৱ কুমাৰ কলিতাই বৃহস্পতিবাৰে সন্ধিয়া এখন সংবাদমেল সম্বোধন কৰি নিৰ্বাচনৰ বাবে প্ৰশাসন সম্পূৰ্ণৰূপে সাজু বুলি সদৰী কৰে ৷ উপায়ুক্ত কলিতাই কয় যে, ধুবুৰী জিলাৰ পাঁচটা বিধানসভা সমষ্টিৰ ভোটগ্ৰহণৰ বাবে প্ৰশাসন ইতিমধ্যে সাজু হৈছে ৷
জিলা নিৰ্বাচনী বিষয়া তথা জিলা উপায়ুক্ত কলিতাই উল্লেখ কৰা মতে, ধুবুৰী জিলাৰ অন্তৰ্গত ধুবুৰী, গৌৰীপুৰ গোলোকগঞ্জ, বিলাসীপাৰা পূব আৰু বিলাসীপাৰা পশ্চিম সমষ্টিত মুঠ ভোটাৰৰ সংখ্যা 9 লাখ 51 হেজাৰ 543 গৰাকী ৷ এইবাৰ জিলাখনত নতুন ভোটাৰৰ সংখ্যা 6262 গৰাকী বুলি তেঁও জানিবলৈ দিয়ে ৷ 8০ বছৰ উৰ্ধৰ ব্যক্তিৰ লগতে দিবাংগ আৰু ক'ভিড-19 আক্রান্ত সকলে প'ষ্টেল ভোট দিব পাৰিব বুলি সংবাদমেলখনত উল্লেখ কৰা হয় ৷
জিলাখনত মুঠ 1422 টা ভোটকেন্দ্ৰৰ ভিতৰত স্পৰ্শকাতৰ ভোট গ্ৰহণ কেন্দ্ৰৰ সংখ্যা হৈছে 128 টা ৷ নিৰ্বাচনৰ বাবে 5926 গৰাকী বিষয়া-কৰ্মচাৰী নিয়োগ কৰি এই বিষয়া কৰ্মচাৰী সকলক ইতিমধ্যে ক'ভিড-19 প্ৰতিষেধক দিয়াৰ প্ৰক্ৰিয়া আৰম্ভ কৰা হৈছে বুলি জিলা প্ৰশাসনে উল্লেখ কৰে ৷ উল্লেখ্য যে, নিৰ্বাচনৰ দিন ঘোষণা হোৱাৰ লগে লগে জিলাখনৰ প্ৰতিটো সমষ্টিত ফ্লায়িং স্কোৰ্টৰ টিম সম্পূৰ্ণ সাজু কৰি ৰখা হৈছে ৷ নিৰ্বাচন সুচাৰুভাৱে পৰিচালনা কৰাৰ বাবে 3902 খন সৰু-বৰ বাহন ধুবুৰী জিলা প্ৰশাসনে অধিগ্ৰহণ কৰিছে বুলি জানিব পৰা গৈছে।
লগতে পঢ়ক: নিৰ্বাচনী আচৰণ বিধিৰ মাজতে চাপৰত 2.78 লাখ নগদ ধন জব্দ
