ধুবুৰী, 05 মে': পূৰ্ণ গতিত চলিছে গৌৰীপুৰৰ পৰা অভয়াপুৰীলৈ ৰে'লপথ নিৰ্মাণৰ কাম ৷ ইতিমধ্যে ধুবুৰীৰ গৌৰীপুৰৰ পৰা বিলাসীপাৰা লৈকে নিৰ্মাণকাৰ্য্য সম্পন্ন হৈছে ৷ কিন্তু এই ৰে'লপথ নিৰ্মাণৰ বাবে জ্বলাকলা খাবলগীয়া হৈছে গৌৰীপুৰ সমষ্টিৰ কেইবাখনো গাঁৱৰ ৰাইজে ৷
ধুবুৰীৰ গৌৰীপুৰৰ পৰা বিলাসীপাৰাৰ পথটো বহিঃবিশ্বৰসৈতে যোগাযোগ কৰা বাবে মূল পথ ৷ গৌৰীপুৰ সমষ্টিৰ অন্তৰ্গত দক্ষিণ গেৰামাৰী, ঝালেৰআলগা, দাঙিৰচৰ, মাঝেৰচৰ আদি অঞ্চলৰ হাজাৰ হাজাৰ লোক এই পথেৰেই যাতায়ত কৰে ৷ সেয়ে ৰে'লপথ নিৰ্মান কৰাৰ পাচত কালভাৰ্ট বনাই সুৰংগ পথ নিৰ্মাণ কৰি দিয়ে ৰেল বিভাগে ৷ কিন্তু ৰাইজৰ অভিযোগ অনুসৰি সুৰংগ পথেৰে যাতায়তৰ নামত নৰক যন্ত্ৰণা ভুগিছে তেওঁলোকে ৷ কিয়নো সামান্য বৰষুণ হলেই সুৰংগটোত একাঠু পানী জমা হয় বুলি জনাই ৰাইজে ৷ ইয়াৰোপৰিও যাতায়তৰ সু-ব্যৱস্থা নথকাৰ ফলত জৰুৰীকালীন 108 এম্বুলেঞ্চ সেৱাৰ পৰাও বঞ্চিত হৈছে ৰাইজ ৷ ইপিনে এই ক্ষেত্ৰত ৰাইজে ৰে'ল বিভাগক অভিযোগ দাখিল কৰে যদিও ৰে'ল বিভাগ এই সন্দৰ্ভত কোনো সঁহাৰি দিয়া নাই বুলি অভিযোগ ৰাইজৰ ৷ সেয়ে ৰাইজে ৰে'ল পথৰ উপৰেদি এখন অভাৰ ব্ৰিজ নিৰ্মান কৰি যাতায়ত ব্যৱস্থা সুচল কৰিবলৈ দাবী জনায়৷ আনহাতে এমজিএনৰেগা আঁচনিৰ জৰিয়তে দহ লাখ টকা ব্যয় সাপেক্ষে ৰে'লপথৰ দুয়ো কাষে নিৰ্মাণ কৰা পথৰ অৱস্থা তেনেই দুখ লগা ৷ নামমাত্ৰ কাম কৰিয়েই বিভাগে দায়িত্ব সামৰাৰ অভিযোগ দিয়ে ৰাইজে ৷ লগতে গৌৰীপুৰ সমষ্টিৰ বিধায়ক নিজানুৰ ৰহমানেও এইক্ষেত্ৰত কোনো গুৰুত্ব প্ৰদান নকৰাৰ অভিযোগ ৰাইজৰ ৷
