ধুবুৰী,23 মে’: ৰাজ্যত অব্যাহত আছে গৰুৰ চোৰাং ছিণ্ডিকেট ৷ বিভিন্ন সময়ত বিশষকৈ ধুবুৰীৰ বিভিন্ন প্ৰান্তৰ পৰা জব্দ কৰা হয় চোৰাঙকৈ সৰহৰাহ কৰা গৰু ৷ শুকুৰবাৰে ধুবুৰীৰ সীমান্তৰ শিয়ালদাহ সীমান্ত সুৰক্ষা বাহিনীৰ অভিযানত জব্দ কৰা হয় চোৰাং ভাৱে সৰবৰাহ কৰা 10টা গৰু । পৰৱৰ্তী সময়ত জব্দকৃত গৰু কেইটা ধুবুৰীৰ ধৰ্মশালা আৰক্ষীক গতাই দিয়ে সীমান্ত সুৰক্ষা বাহিনীয়ে ৷
অভিযোগ অনুসৰি, ধুবুৰী গৌৰীপুৰৰ আন্তঃৰাষ্ট্ৰীয় গো-মাফিয়া আদম আলী আৰু চণ্ডীৰ নেতৃত্বত ধুবুৰীত গঢ়ি উঠিছিল গৰুৰ বৃহৎ চোৰাং ছিণ্ডিকেট । পৰৱৰ্তী সময়ত আদম আলীক ধুবুৰী আৰক্ষীয়ে গ্ৰেপ্তাৰ কৰি জেল হাজোতলৈ প্ৰেৰণ কৰাৰ লগতে ধুবুৰীৰ আন কেইবাজনকো এই সংক্ৰান্তত আটক কৰে ধুবুৰী আৰক্ষীয়ে । যাৰ ফলত কিছু পৰিমাণে ধুবুৰীৰ সীমান্তত হ্ৰাস পাইছিল গৰুৰ চোৰাং কাৰবাৰ । কিন্তু পুনৰ যেন আৰম্ভ হৈছে গৰুৰ এনে চোৰাং কাৰবাৰ ।
উল্লেখ্য যে, দুৰ্নীতি নিৰ্মূল কৰিবলৈ ধুবুৰীৰ নতুন আৰক্ষী অধীক্ষক গৌৰৱ অভিজিৎ দিলীপে যিকোনো চোৰাং ছিণ্ডিকেট আৰু অপৰাধীৰ বিৰুদ্ধে হুংকাৰ প্ৰদান কৰাৰ প্ৰদান কৰিছিল ৷ তাৰ পাচতেই আৰক্ষী তথা সীমান্ত সুৰক্ষা বাহিনীয়ে জব্দ কৰে চোৰাং ভাৱে অনা গৰু কেইটা ৷
প্ৰাপ্ত তথ্য অনুসৰি, চোৰাং গৰু ব্যৱসায়ীয়ে বহিঃৰাজ্যৰ পশুধন অসম-বংগ সীমান্তৰে ধুবুৰীত প্ৰৱেশ কৰোৱাই বিভিন্ন ভিতৰুৱা পথেৰে জাকে জাকে গৰু নিয়া হয় সীমান্ত অঞ্চললৈ । তাৰ পিছতেই সুযোগ বুজি উন্মুক্ত সীমান্তইদি নিশাৰ ভাগত বাংলাদেশলৈ চালান দিয়া হয় এই পশুধনক । অসম-বংগ সীমান্তৰ ছাগলীয়া, আগমণি, গোলকগঞ্জ, বালাজান, গৌৰীপুৰ আৰু ধুবুৰী আৰক্ষী থানা এলেকাৰ বিভিন্ন ভিতৰুৱা স্থল পথেৰে গৰু সমূহ সীমান্ত লৈ নিয়া হয় । এই ক্ষেত্ৰত আৰক্ষীও জড়িত থকাৰ অভিযোগ উত্থাপন কৰি আহিছে সচতন মহলে ৷
লগতে পঢ়ক: ধুবুৰীক অপৰাধমুক্ত কৰিবলৈ প্ৰতিশ্ৰুতিবদ্ধ আৰক্ষী অধীক্ষক গৌৰৱ অভিজিৎ দিলীপ
