বিলাসীপাৰা , 04 এপ্ৰিল : "অগপ আৰু কংগ্ৰেছ দলৰ প্ৰাৰ্থীদ্বয়ে মনোনয়ন দাখিল কৰিবলৈ লগত অনা লোক সকল ভাড়াত অহা মানুহ ৷ 4 নং ধুবুৰী লোক সভা সমষ্টিত তেওঁ অপ্ৰতিদ্বন্দী ৷ " বুধবাৰে পূব বিলাসীপাৰাৰ সোণামুখী অঞ্চলত অনুষ্ঠিত এক কৰ্মী সভাত সাংসদ বদৰুদ্দিন আজমল উপস্থিত হৈ এই মন্তব্য প্ৰকাশ কৰে ৷
এআই ইউ ডি এফ দলৰ বুলি খ্যাত 4 নং ধুবুৰী লোক সভা সমষ্টি ৷ কিন্তু এইবাৰ নিৰ্বাচনত যেন এক অজান শংকাত ভুগি থকা পৰিলক্ষিত হ'ল সমষ্টিটোৰ পূৰ্বৰ সাংসদ আজমলক ৷বিগত দহটা বছৰে নিজৰ দখলত ৰখা সমষ্টিটোত এইবাৰ দলৰ তৃণমূল স্তৰৰ নেতা কৰ্মীৰ বিষোদগাৰে দলটোক বিপদত পেলোৱাৰ শংকাত ভুগিছে সাংসদ আজমল ৷ যাৰ বাবে জনসভা নহয় কৰ্মীসভাত ব্যস্ত থকা দেখিবলৈ পোৱা গৈছে সাংসদ আজমলক ৷ইয়াৰে অংশ হিচাপে বুধবাৰে বিয়লি পূব বিলাসীপাৰা সমষ্টিৰ সোণামুখী অঞ্চলত এক কৰ্মী সভাত উপস্থিত হয় আজমল ৷ এই সভাত উপস্থিত হৈ আজমলে ভোটভিক্ষা কৰাৰ লগতে দলীয় কৰ্মী সকলক নিষ্ঠাৰে কাম কৰাৰ আহ্বান জনায় ৷ সমষ্টিটোত এইবাৰ যেন এআইইউডিএফ দলৰ ভেটি থৰক-বৰক হৈ পৰাৰ আশংকাত ভুগি থকা আজমলে প্ৰথমে ভোটাৰ ৰাইজৰ কাষ চপাৰ আগতে তৃণমূল পৰ্যায়ৰনেতা কৰ্মী সকলক একত্ৰিত কৰাৰ প্ৰয়াস কৰিছে ৷সেই লক্ষ্যৰেই বিলাসীপাৰাত এখনৰ পিচত আন এখন কৈ কৰ্মী সভা অনুষ্ঠিত কৰাত ব্যস্ত আজমল ৷আনহাতে ৰাজ্যৰ তিনি খন আসনত দলে দিয়া প্ৰাৰ্থী তিনিজনে বিপুল ভোটৰ ব্যৱধানত জয়ী হৈ আহিব বুলি মন্তব্য কৰে সাংসদ আজমলে ৷উল্লেখ্য যে, এই কৰ্মী সভাত কংগ্ৰেছৰ নিৰ্বাচিত পঞ্চায়ত প্ৰতিনিধি আৰু জ্যেষ্ঠ কংগ্ৰেছীসহ কেইবা শতাধিক কৰ্মীয়ে এ আই ইউ ডি এফ দলত যোগদান কৰে ৷ এতিয়া আজমল নেতৃত্বতাধীন দলটোৱে ৰাজ্যত কেই খন আসনত জয়ী হ’ব সেয়া পৰৱৰ্তী সময়তহে স্পষ্ট হৈ পৰিব ৷
