প্ৰাপ্য আদায়ৰ দাবীত বিলাসীপাৰাত ক’ভিড যোদ্ধাৰ প্ৰতিবাদ

আগশাৰীত থাকি ক'ভিড যোদ্ধা হিচাপে কৰ্মৰত বিলাসীপাৰাৰ একাংশ স্বাস্থ্য কৰ্মীয়ে প্ৰাপ্য আদায়ৰ দাবীত সাব্যস্ত কৰিব লগীয়া হৈছে তীব্ৰ প্ৰতিবাদ ৷ সদৌ অসম অস্থায়ী চৰকাৰী চিকিৎসালয়ৰ স্বাস্থ্য কৰ্মী সন্থাৰ ধুবুৰী জিলা সমিতিয়ে সাব্যস্ত কৰে এই প্ৰতিবাদ ৷

পশ্চিম বিলাসীপাৰা, 21 জুন : ক'ভিড যোদ্ধা হিচাপে কৰ্মৰত একাংশ স্বাস্থ্য কৰ্মীয়ে বিলাসীপাৰাত প্ৰাপ্য আদায়ৰ দাবীত নামিল প্ৰতিবাদত ৷ বিলাসীপাৰাৰ বৰকান্দা উচ্চতৰ মাধ্যমিক বিদ্যালয়ৰ খেল পথাৰত এই সকল স্বাস্থ্য কৰ্মীয়ে প্ৰাপ্য আদায়ৰ দাবীত সাব্যস্ত কৰিলে তীব্ৰ প্ৰতিবাদ ৷

উল্লেখ্য যে, বিগত ১০-১৫ বছৰ ধৰি ৰাজ্যৰ বিভিন্ন প্ৰান্তৰ লগতে ধুবুৰী জিলাৰ চৰকাৰী চিকিৎসালয় সমূহত নিয়োজিত হৈ আছে এই সকল স্বাস্থ্য কৰ্মী ৷ সামান্য পাৰিতোষিকৰ বিনিময়ত দিনে নিশাই সেৱা আগবঢ়াই অহা এই সকল অস্থায়ী স্বাস্থ্য কৰ্মীৰ আজি পৰ্যন্ত নহ’ল চাকৰিৰ নিয়মীয়া কৰণ ৷

এই সকল স্বাস্থ্য কৰ্মীৰ চাকৰীৰ নিয়মীয়া কৰণৰ লগতে বহুকেইটা দাবীৰে সদৌ অসম অস্থায়ী চৰকাৰী চিকিৎসালয়ৰ স্বাস্থ্য কৰ্মী সন্থাৰ ধুবুৰী জিলা সমিতিয়ে সাব্যস্ত কৰে এই উত্তাল প্ৰতিবাদ ৷ স্বাস্থ্য কৰ্মী সকলে হাতে হাতে বেনাৰ, প্লে-কাৰ্ড লৈ বিভিন্ন শ্লোগানেৰে উত্তাল কৰি তোলে প্ৰতিবাদস্থলী ৷ নিজৰ জীৱনটোক তুচ্ছ জ্ঞান কৰি ক'ভিড ১৯ ৰ বিৰুদ্ধে যুঁজ দি অহা এই সকল অস্থায়ী স্বাস্থ্য কৰ্মীৰ চাকৰী অতি শীঘ্ৰে নিয়মীয়া কৰিবলৈ মুখ্যমন্ত্ৰীৰ লগতে স্বাস্থ্যমন্ত্ৰীলৈ আহ্বান জনালে ধুবুৰী জিলা স্বাস্থ্য কৰ্মী সমিতিয়ে ৷

আনহাতে, চৰকাৰে ঘোষণা কৰা এক লাখ চৰকাৰী চাকৰিত এই সকল অস্থায়ী স্বাস্থ্য কৰ্মীক অন্তৰ্ভূক্ত কৰিব লাগে বুলিও দাবী তুলিছে প্ৰতিবাদী স্বাস্থ্য কৰ্মীসকলে ৷

লগতে পঢ়ক : চিৰাঙত চাৰিলেন যুক্ত পথ নিৰ্মানৰ বিৰুদ্ধে উত্তাল প্ৰতিবাদ