ধেমাজি,21 ফেব্ৰুৱাৰী: ২২ ফ্ৰেব্ৰুৱাৰীত দেশৰ প্ৰধানমন্ত্ৰী নৰেন্দ্ৰ মোডীয়ে মুকলি কৰিব বহু প্ৰতীক্ষিত ধেমাজি অভিযান্ত্ৰিক মহাবিদ্যালয় ৷ বহু প্ৰতিক্ষাৰ অন্তত ধেমাজিবাসীৰ এটা সপোন পৰিসমাপ্তিৰ দিশে আগবাঢ়িছে ৷ প্ৰায় ২৬৮ বিঘা ভূমিত ইতিমধ্যে নিৰ্মাণ কাৰ্য সম্পূৰ্ণ হৈছে প্ৰশাসনীয় ভৱন, শৈক্ষিক ভৱন, অধ্যক্ষৰ বাসগৃহ, ছাত্ৰাবাস-ছাত্ৰী নিবাস আৰু কাৰখানা গৃহৰ লগতে অতিথিশালা ৷
ধেমাজিৰ কুলাজান চিতলমাৰীত হ’বলগীয়া বিশাল জনসভাৰ পৰাই ডিজিটেল মাধ্যমেৰ মোডীয়ে উদ্বোধন কৰিব বহু প্ৰতীক্ষিত মহাবিদ্যালয়খন ৷ ইতিমধ্যে বিগত বৰ্ষৰ শেষভাগৰ পৰাই চাৰিটা বিভাগ ক্ৰমে চিভিল, মেকানিকেল, ইলেকট্ৰিকেল আৰু কম্পিউটাৰ চায়েঞ্চ এণ্ড টেক্নলজীৰ ১৮০ খন আসন থকা মহাবিদ্যালয়খনত এইবেলি ১৬০ গৰাকী ছাত্ৰ-ছাত্ৰীয়ে অনলাইনযোগে পাঠ গ্ৰহণ কৰি আহিছিল ৷ প্ৰধানমন্ত্ৰীয়ে মুকলি কৰাৰ পিছতেই মহাবিদ্যালয়ৰ শ্ৰেণীকোঠাত ছাত্ৰ-ছাত্ৰীসকলে পাঠদান কৰিব বুলি অধ্যক্ষ ড° দিলীপ বৰাই জানিবলৈ দিয়ে ৷
তদুপৰি অনান্য অভিযান্ত্ৰিক মহাবিদ্যালয়ৰ তুলনাত একমাত্ৰ ধেমাজি অভাযান্ত্ৰিক মহাবিদ্যালয়তেই কম্পিউটাৰ চায়েঞ্চত সৰ্বাধিক ৬০ খন আসনৰ ব্যৱস্থা থকাৰ কথা সদৰী কৰে অধ্যক্ষগৰাকীয়ে ৷ ইতিমধ্যে মহাবিদ্যালয়খনত শিক্ষক আৰু কৰ্মচাৰীৰ নিযুক্তি প্ৰক্ৰিয়া আৰম্ভ কৰিছে সংশ্লিষ্ট বিভাগে ৷ বিশেষকৈ আনুষ্ঠানিক মুকলি দিনটোৰ বাবে মহাবিদ্যালয়খনৰ গৃহ আৰু চৌহদ পৰিস্কাৰ কৰিছে কৰ্তৃপক্ষই ৷
উল্লেখ্য যে, ধেমাজিবাসীৰ দীৰ্ঘদিনীয়া দাবীৰ প্ৰতি সঁহাৰি জনাই 2011 বৰ্ষৰ 20 ফেব্ৰুৱাৰীৰ দিনটোত ৰাজ্যৰ তদানীন্তন প্ৰয়াত মুখ্যমন্ত্ৰী তৰুণ গগৈয়ে ধেমাজিৰ টেকজুৰিত ধেমাজি অভিযান্ত্ৰিক মহাবিদ্যালয়ৰ আধাৰশিলা স্থাপন কৰিছিল ৷ বহু প্ৰতীক্ষাৰ অন্ত পেলাই এতিয়া সোনালী ক্ষণ গণাৰ মুহুৰ্তত ধেমাজিবাসী ৷ ইপিনে উত্তৰ পাৰৰ প্ৰথমখন কাৰিকৰী প্ৰতিষ্ঠানে স্থানীয় ছাত্ৰ-ছাত্ৰীৰ লগতে অঞ্চলবাসীক লাভান্বিত কৰিব আশা প্ৰকাশ কৰিছে ছাত্ৰ সমাজে ৷
