জোনাই, ৭ এপ্ৰিল : ৰাজ্যত নেৰানেপেৰা বৰষুণৰ ফলত ধেমাজিত এইবাৰ বানত বুৰ গৈছে শ শ বিঘা নহৰু খেতি(Garlic cultivation in Assam) । জোনাই সমষ্টিৰ চমকং গাঁও পঞ্চায়তত লালী নৈ পাৰৰ অপ্সৰা, চিভিল কৈৱৰ্ত, লামা আদি কেইবাখনো গাঁৱত নহৰু, সৰিয়হ, আলু খেতি আদি ফচল একাঠুৰ পৰা একঁকাল পানীৰ মাজত গেলিবলৈ ধৰিছে । নাও লৈ তুলিব লগা হৈছে সপোনৰ খেতি নহৰু ।
নহৰু খেতিৰ বাবে বিখ্যাত ব্ৰহ্মপুত্ৰ পাৰৰ এই তিনিখন গাঁৱৰ লোকৰ বাবে এইবাৰৰ অকস্মাতে অহা বানে কাল হৈ পৰা বুলি উল্লেখ কৰে ভুক্তভোগী খেতিয়কে । কাৰণ চ'ত মাহত কেতিয়াও বান হোৱা নাছিল উক্ত গাঁও অঞ্চলত । এইক্ষেত্ৰত অকস্মাতে এই বান ক'ৰ পৰা আহিল, ইয়াক লৈ সন্দেহ প্ৰকাশ কৰিছে খেতিয়ক ৰাইজে ।
এয়া নদীবান্ধৰ অতিৰিক্ত পানী এৰি দিয়াৰ ফল বুলিও সন্দেহ কৰিছে ৰাইজে (Dams responsible for causing floods in Assam) । কৃষি প্ৰধান গাঁওকেইখনত বিগত বছৰৰ দৰে নহৰু বিক্ৰী কৰি ৰঙালী বিহুৰ আনন্দ লোৱা পৰিৱৰ্তে এই সকল খাঁটি খোৱা গঁঞা ৰাইজে মূৰে কপালে হাত দিব লগাত পৰিছে । আনহাতে এই খবৰ জনপ্ৰতিনিধি তথা জিলা কৃষি বিভাগক খবৰ দিয়াৰ পিছতো গেলি-পচি যোৱা খেতিয়কৰ ফচল চাবলৈ নহাত ক্ষুব্ধ হৈ পৰে ৰাইজ ।
লগতে পঢ়ক : চ’ত মাহতে বানত বুৰিল নাৰায়ণপুৰৰ বিস্তৃত অঞ্চল