জোনাই, ১৭ ছেপ্টেম্বৰ: চিয়াং নৈৰ মথাউৰি নিৰ্মাণৰ নামত সংঘটিত হৈছে বিয়াগোম কেলেংকাৰী(Huge scam in dam construction) ৷ জোনাইত জলসম্পদ বিভাগৰ দ্বাৰা আৱন্টিত প্ৰায় ৪.৫ কোটি টকীয়া নিৰ্মীয়মান মথাউৰি এজাক বৰষুণতে চপৰা-চপৰে জহি-খহি যোৱা পৰিলক্ষিত হৈছে ।
প্ৰতি বছৰে বানে বিধ্বস্ত কৰা জোনাইৰ বেৰাচাপৰি অঞ্চলক চিয়াং নৈৰ বান-খহনীয়া প্ৰতিৰোধৰ বাবে জলসম্পদ বিভাগে ৪.৫ কোটি টকা ব্যয়েৰে চলিত বৰ্ষৰপৰা বেৰা চাপৰিৰ বেৰা মাজগাওঁৰ পৰা শান্তিপুৰলৈ প্ৰায় ৩ কিলোমিটাৰ দৈৰ্ঘৰ এটা মথাউৰি নিৰ্মাণৰ কাম আৰম্ভ কৰে । কিন্তু মথাউৰি নিৰ্মাণৰ ক্ষেত্ৰত ঠিকাদাৰ, বিভাগীয় অভিযন্তা, বিষয়াৰ গোপন বুজাবুজিত মাটি ব্যৱহাৰ কৰাৰ বিপৰীতে মাথো বালিৰে নিৰ্মাণ কৰাত মথাউৰিটো সাধাৰণ বৰষুণতে চপৰা-চপৰে খহি যোৱা পৰিলক্ষিত হৈছে ৷
লুণ্ঠনৰ মনোভাৱেৰে এনেদৰে সম্পূৰ্ণ বালি ব্যৱহাৰ কৰি মথাউৰি নিৰ্মাণক লৈ এতিয়া গৰজি উঠিছে জোনাইৰ বিভিন্ন দল-সংগঠন ৷ মথাউৰি নিৰ্মাণৰ নামত বিভাগীয়ভাৱে সংঘটিত হোৱা কেলেংকাৰীৰ বাতৰি সংবাদ মাধ্যমযোগে বিভিন্ন সময়ত প্ৰচাৰ হৈ আহিছে যদিও কেৱল মাত্ৰ কমিচনৰ অংকত বিভাগীয় কৰ্তৃপক্ষই নীৰৱ ভূমিকা গ্ৰহণ কৰা পৰিলক্ষিত হৈছে ৷
বিভাগীয় কৰ্তৃপক্ষৰ নীৰৱ ভূমিকাৰ বিৰুদ্ধে জোনাইৰ বিভিন্ন দল সংগঠন তথা স্থানীয় ৰাইজ সৰৱ হোৱা পৰিলক্ষিত হৈছে ।
লগতে পঢ়ক: জলবায়ু পৰিবৰ্তনৰ নেতিবাচক প্ৰভাৱ: শীৰ্ষত আছে কৰিমগঞ্জ
