ধেমাজি,20 মাৰ্চঃ ধেমাজিৰ নিৰ্বাচনী সভাত মন্ত্ৰী হিমন্ত বিশ্বৰ নৃত্য ৷ মঞ্চত উপস্থিত হৈয়ে "আকৌ এবাৰ মোডী চৰকাৰ" শীৰ্ষক গীতৰ তালে তালে নাচিলে জনপ্ৰিয় বিজেপি নেতা তথা মন্ত্ৰী হিমন্ত বিশ্ব শৰ্মাই ৷ হিমন্ত বিশ্বই মঞ্চত নৃত্য প্ৰদৰ্শন কৰাৰ লগে লগে ধেমাজি তেলিজান পথাৰত সমবেত প্ৰায় দহ সহস্ৰাধিক দলীয় সমৰ্থক তথা অনুগামীয়ে ৰ’ব নোৱাৰি মন্ত্ৰীগৰাকীৰ সমানে সমানে নাচৰ তালত নৃত্য প্ৰদৰ্শন কৰে ৷
উল্লেখ্যযোগ্য যে, ১১৩ নং ধেমাজি বিধানসভা সমষ্টিৰ বিজেপি মিত্ৰজোঁটৰ প্ৰাৰ্থী ডাঃ ৰণোজ পেগুৰ হৈ নিৰ্বাচনী প্ৰচাৰৰ চলোৱাৰ অৰ্থে শনিবাৰে তেলিজান পথাৰৰ বিশাল নিৰ্বাচনী সভাত অংশ লয় মন্ত্ৰী হিমন্ত বিশ্ব শৰ্মাই ৷ এখন হেলিকপ্তাৰেৰে আহি ধেমাজিত উপস্থিত হোৱা মন্ত্ৰী হিমন্তই নিৰ্বাচনী সভাত অংশ লৈয়ে চৰকাৰে ৰূপায়ণ কৰা আঁচনি সমূহৰ বিষয়ে আলোকপাত কৰাৰ উপৰি কংগ্ৰেছ মহাজোঁট তথা এআইইউডিএফ-ৰ মুৰব্বী বদৰুদ্দিন আজমলক সমালোচনাৰে থকা সৰকা কৰি ২৭ মাৰ্চত পদুম ফুলৰ চিহ্নত ভোট দি বিজেপি প্ৰাৰ্থী ডা: ৰণোজ পেগুক জয়ী কৰাবলৈ ৰাইজক আহ্বান জনায় ৷
