ধেমাজিত কোৱাৰেন্টাইন কেন্দ্ৰত খাদ্যৰ অভাৱ

কোৱাৰেন্টাইন কেন্দ্ৰটোত থকা লোকসকলে প্ৰয়োজনীয় খাদ্যৰ অভাৱত পৰা বুলি অভিযোগ উত্থাপন কৰি এই সন্দৰ্ভত স্বাস্থ্য বিভাগৰ পৰা উপযুক্ত ব্যৱস্থা গ্ৰহণ কৰিবলৈ দাবী উত্থাপন কৰিছে ৷

ধেমাজি, 23 মে': ৰাজ্যৰ কোৱাৰেন্টাইন কেন্দ্ৰসমূহত ক্ৰমাৎ বৃদ্ধি পাইছে বহিঃৰাজ্যৰ পৰা অহা লোকৰ সংখ্যা ৷ চৰকাৰ তথা প্ৰশাসনে কেন্দ্ৰসমূহত থকাসকলৰ বাবে পাৰ্যমানে কৰিছে যাৱতীয় ব্যৱস্থা ৷ কিন্তু ইয়াৰ মাজতে ধেমাজি ইঞ্জিনিয়াৰিং কলেজৰ কোৱাৰেন্টাইন কেন্দ্ৰৰ বিৰুদ্ধে উত্থাপন হৈছে খাদ্যৰ অভাৱৰ অভিযোগ ৷ কোৱাৰেন্টাইন কেন্দ্ৰটোত থকা লোকসকলে প্ৰয়োজনীয় খাদ্য অভাৱত পৰা বুলি অভিযোগ উত্থাপন কৰি এই সন্দৰ্ভত স্বাস্থ্য বিভাগৰ পৰা উপযুক্ত ব্যৱস্থাৰ দাবী কৰিছে ৷

অভিযোগ অনুসৰি পুৱাৰ ব্ৰেকফাষ্ট আৰু আন খাদ্য সামগ্ৰীসমূহ কোৱাৰেন্টাইন চেন্টাৰৰ গেটত সংশ্লিষ্ট দায়িত্বপ্ৰাপ্ত লোকে থৈ যোৱাৰ লগে লগে কোৱাৰেন্টাইন চেন্টাৰত থকা আৱাসীৰ মাজত হেতা-ওপৰা লাগে ৷ ফলত নতুনকৈ ভৰ্তি হোৱাসকলে খাদ্যৰ পৰা বঞ্চিত হ'ব লগা হৈছে বুলি অভিযোগ উত্থাপন হৈছে ৷ এই সন্দৰ্ভত সুব্যৱস্থা কৰিবলৈ জিলা প্ৰশাসনক দাবী জনাইছে সংযুক্ত বড়ো গণ মঞ্চ চমুকৈ ইউবিপিঅৰ মধ্য জোনাই আঞ্চলিক সমিতিয়ে ৷

বিগত 17 মে'ৰ নিশা প্ৰায় 11 বজাত অন্ধ্ৰপ্ৰদেশৰ পৰা জোনাই মহকুমাৰ চিমেন চাপৰি আৰক্ষী থানাৰ অন্তৰ্গত ৰামধন দিখাৰী অঞ্চলৰ বিঞ্চুপুৰ, জামুগুৰী, গাঁৱৰ পাঁচগৰাকী শ্ৰমিকে ৰে'লৰে আহি 19 মে'ৰ নিশা প্ৰায় 9 বজাত গুৱাহাটী পায়হি ৷ তাৰ পাছতে নিশা 10 বাজি 30 মিনিটত গুৱাহাটীৰ পৰা বাছেৰে আহি 20 মে'ৰ পুৱা 10 বাজি 30 বজাত ধেমাজিত উপস্থিত হয় ৷ লগে লগে বহিঃ ৰাজ্যৰ পৰা অহা শ্ৰমিক সকলক ধেমাজি ইঞ্জিনিয়াৰিং কলেজত স্থাপন কৰা কোৱাৰেন্টাইন কেন্দ্ৰত ৰখাৰ ব্যৱস্থা কৰে ধেমাজি আৰক্ষী-প্ৰশাসনে ৷

লগতে পঢ়কঃ 99গৰাকী যাত্ৰীসহ পাকিস্তানত ভূ-পতিত বিমান