সুৰাৰ ৰাগীত মাতাল শিক্ষকঃ গীত গাই নৃত্য কৰিলে বিদ্যালয়ত

এগৰাকী প্ৰধান শিক্ষকৰ কাণ্ড ৷ বিদ্যালয়ৰ চৌহদত হিন্দী আৰু অসমীয়া গীতৰ তালে তালে নাচিলে এইজন ছাৰে ৷

ধেমাজি, 28 নৱেম্বৰঃ সুৰাৰ ৰাগীত মাতাল এগৰাকী প্ৰধান শিক্ষক ৷ ছাৰে বিদ্যালয়ত শিক্ষাৰ্থীৰ সন্মুখতে গালে হিন্দী গানকে ধৰি অসমীয়া গানো ৷ গান গোৱাৰ লগতে গীতৰ তালে তালে সমানে নৃত্যও কৰিলে ছাৰে ৷

এই কাণ্ড সংঘটিত হৈছে ধেমাজি শিক্ষাখণ্ডৰ অন্তৰ্গত হাতীপৰা নিম্ন প্ৰাথমিক বিদ্যালয়ত ৷ বিদ্যালয়খনৰ প্ৰধান শিক্ষক ৰঞ্জন চাংমাইৰ বিৰুদ্ধে উত্থাপন হৈছে এই গুৰুতৰ অভিযোগ ৷ বিদ্যাৰ্থীক পঢ়াবলৈ এৰি ছাৰে টেঁটুৰ গুৰিলৈকে মদ গিলি আহি বিদ্যালয়তে পৰি থাকে ৷ অৱশেষত ছাৰৰ কৰ্মকাণ্ডত অতিষ্ঠ হোৱা স্থানীয় ৰাইজৰ অভিযোগৰ ভিত্তিতে বিদ্যালয়খনত উপস্থিত হয় সাংবাদিকৰ দল ৷ সুৰা সেৱন কৰাৰ কথা সাংবাদিকৰ আগত অকপটে স্বীকাৰ কৰিলে ছাৰে ৷ বৰ্তমান সময়ত ৰাজ্যৰ শিক্ষা ব্যৱস্থাৰ এয়াই এখন বাস্তৱ ছবি ৷ যিটো সময়ত ৰাজ্যত শিক্ষিত নিবনুৱাই চাকৰিৰ বাবে হাহাকাৰ কৰি ফুৰিছে, তেনে সময়ত এইসকল শিক্ষকৰ এনে ব্যৱহাৰে সমগ্ৰ শিক্ষা ব্যৱস্থাকে নিম্নস্তৰলৈ লৈ গৈছে ৷ এইক্ষেত্ৰত শিক্ষামন্ত্ৰীয়ে কি ব্যৱস্থা গ্ৰহণ কৰে সেয়াহে লক্ষণীয় হ'ব ৷