ধেমাজী, 8 ডিচেম্বৰ: চিকিৎসাৰ অভাৱত 9 বছৰে বিচনাই একমাত্ৰ সংগী হৈ ৰৈছে ধেমাজিৰ এটি শিশুৰ ৷ কণমানিটোৰ বাবে সঠিক চিকিৎসাৰ ব্যৱস্থা কৰিবলৈ অপাৰগ আৰ্থিক সংকটত জুৰুলা শিশুটিৰ পৰিয়াল ৷ ফলত বিগত 9 টা বছৰে বিচনাখনকেই আশ্ৰয় কৰি আগবাঢ়িছে জটিল ৰোগত আক্ৰান্ত এটি অবুজ শিশুৰ ভৱিষ্যত ৷
জানিব পৰামতে জন্মৰ পাছতে ধেমাজিৰ জয়ৰামপুৰ লালুকীজান নিবাসী বিষ্ণু ফুকন আৰু ৰূপা চেত্ৰী ফুকনৰ একমাত্ৰ সন্তান জ্ঞানজ্যোতি এক জটিল ৰোগত আক্ৰান্ত হয় ৷ শিশুটিৰ পিতৃ মাতৃয়ে জানিবলৈ দিয়ে যে, বিগত 9 বছৰে অনিশ্চয়তাক সংগী কৰি বিছনাতেই দিন ৰাতি পাৰ কৰিব লগা জ্ঞানজ্যোতিক দাংকোলাকৈ নিনিলে একেবাৰে লৰচৰ কৰিব নোৱাৰে ৷
তেওঁলোকে কয় যে, শিশুটি সম্পূৰ্ণৰূপে সুস্থ হৈ উঠিবলৈ চিকিৎসাৰ বাবে এক মোটা অংকৰ ধনৰ প্ৰয়োজন হ'ব ৷ কিন্তু এসাঁজ খাই অন্য সাঁজলৈ চিন্তা কৰিবলগীয়া পৰিয়ালটোৱে জয়ৰামপুৰৰ পৰা গুৱাহাটী বা ডিব্ৰুগড়লৈ শিশুটিক লৈ যোৱাটো এক চিন্তনীয় বিষয় ৷
নিজ সন্তানক চিকিৎসা প্ৰদান কৰিব নোৱাৰি অসহায় হৈ পৰা পিতৃ-মাতৃয়ে এতিয়া শিশুটিৰ চিকিৎসাৰ বাবে ৰাইজক কাতৰ আহ্বান জনাইছে ৷
লগতে পঢ়ক: এগৰাকী ৬০ উৰ্ধৰ ব্যক্তিৰ আশ্ৰয়থল প্ৰস্তুত কৰি দিলে "চেলেংহাট হেল্থ ক্লাৱে"
