ধেমাজি, ১১ ডিচেম্বৰ: নাগৰিকত্ব সংশোধনী বিধেয়ক গৃহীত হোৱাৰ এবছৰ সম্পূৰ্ণ হোৱাৰ দিনটোত পুনৰ 'কা' বিৰোধী প্ৰতিবাদে কঁপালে ৰাজ্য । ৰাজ্যৰ প্ৰান্তে প্ৰান্তে প্ৰতিবাদী কাৰ্যসূচী ৰূপায়ণ কৰি জাতিধ্বংসী আইন বাতিলৰ দাবী উত্থাপন কৰে জাতীয় সংগঠনে । অসম জাতীয়তাবাদী যুৱ ছাত্ৰ পৰিষদৰ ধেমাজি জিলা সমিতিয়ে 'কা' আন্দোলনৰ সময়ত প্ৰাণ হেৰুওৱা ৫ জন শ্বহীদ ক্ৰমে দীপাঞ্জল দাস, আব্দুল আলিম, ঈশ্বৰ নায়ক, দ্বিজেন্দ্ৰ পাংগিং আৰু ছেম ষ্টেফ’ৰ্ডক স্মৰণ কৰি শ্ৰদ্ধাঞ্জলি জনায় ।
ধেমাজি বেচৰকাৰী বাছ আস্থান চৌহদত আয়োজিত শ্ৰদ্ধাঞ্জলি অনুষ্ঠানত যুৱ ছাত্ৰ পৰিষদৰ লগতে সদৌ ধেমাজি জিলা ছাত্ৰ সন্থাৰ বিষয়ববীয়া, তাই আহোম ছাত্ৰ সন্থা, ধেমাজি শিল্পী সমাজ আৰু স্থানীয় ৰাইজে সহযোগ কৰে । লগতে নাগৰিকত্ব সংশোধনী বিধেয়ক বাতিলৰ দাবীত প্ৰতিবাদী কাৰ্যসূচীও ৰূপায়ণ কৰে সংগঠনটোৱে । এই প্ৰতিবাদী কাৰ্যসূচীত অংশ লৈ অসম জাতীয়তাবাদী যুৱ ছাত্ৰ পৰিষদৰ জিলা সমিতিৰ সম্পাদক বিষ্ণু শৰ্মা, কেন্দ্ৰীয় সমিতিৰ সাংস্কৃতিক সম্পাদক দেৱজিত দাসে জাতি ধ্বংসী কাৰ্যৰ লগত জড়িত চৰকাৰখনক তীব্ৰ সমালোচনা কৰে ৷
প্ৰতিবাদীস্থলীৰ পৰা বিশাল প্ৰতিবাদী সমদল বাহিৰ কৰে সংগঠনটোৱে ৷ ঠায়ে ঠায়ে ক'লা পতাকা প্ৰদৰ্শন কৰি প্ৰতিবাদ সাব্যস্ত কৰে ৷ 'কা' আমি নামানো, অসম বিৰোধী হুচিয়াৰ, জাতি দ্ৰোহী সাৱধান আদি শ্ল'গানেৰে ধেমাজি ৰাজপথ উত্তাল কৰি তোলে প্ৰতিবাদকাৰীয়ে ৷
লগতে পঢ়ক:নিৰ্বাচন শেষ হোৱাৰ পিছতো চিৰাঙত অব্যাহত নিৰ্বাচনী হিংসা
