দলগাঁও, ২২ আগষ্টঃ অসম চৰকাৰৰ হস্ততাঁত আৰু বস্ত্ৰ প্ৰশিক্ষণ কেন্দ্ৰত চৰম দুৰ্নীতি ৷ দৰঙৰ দলগাঁৱত থকা হস্ততাঁত আৰু বস্ত্ৰ প্ৰশিক্ষণ কেন্দ্ৰটোত প্ৰশিক্ষণ দিবলৈ প্ৰশিক্ষক আৰু কৰ্মচাৰী আছে যদিও নাই কোনো তাঁতশালৰ সঁজুলি ৷ তাৎপৰ্যপূৰ্ণ ভাৱে তাঁতশালৰ সলনি প্ৰশিক্ষণ দিয়া হয় এখন ব্লেক বৰ্ডত৷ তাঁত শালৰ মাকো, যঁতৰত কৰা কাম, সূতা পকোৱা ইত্যাদি সকলো কাম ব্লেকবৰ্ডতে শিকাই প্ৰশিক্ষকে । বছৰ বছৰ ধৰি মামৰে ধৰা, মকৰাৰ জালেৰে আবৃত তাঁতশাল সমূহ পৰি আছে যদিও কোনো গুৰুত্ব নাই বিভাগটোৰ৷ তাৰোপৰি নতুন তাঁতশাল ক্ৰয় কৰাৰ বাবে বিভাগীয় কৰ্তৃপক্ষয়ো কোনো ব্যৱস্থা গ্ৰহণ নকৰাৰ অভিযোগ ।
তাঁতশাল নথকাকৈ যুৱক যুৱতী সকলে কেনেকৈ হস্ততাঁত আৰু বয়ন শিল্পৰ প্ৰশিক্ষণ লৈ আছে এই লৈ স্থানীয় ৰাইজৰ মাজত ব্যপক প্ৰতিক্ৰিয়াৰ সৃষ্টি হৈছে ৷ একাংশৰ মতে তাঁতশাল নোহোৱাকৈ এনেধৰণৰ ভুৱা প্ৰশিক্ষণ দিয়াৰ নামত বিভাগটোৰ এচাম বৰমূৰীয়াই কৰিছে ধন আত্মসাৎ ৷ প্ৰশিক্ষণ কেন্দ্ৰটোত ছাত্ৰ ছাত্ৰীৰ বাবে শ্ৰেণী কোঠা , ডেক্স বেঞ্চ আছে যদিও এদিনো ৰাইজে দেখা নাপালে কেন্দ্ৰটোত প্ৰশিক্ষণ ল'বলৈ যোৱা কোনো এজন যুৱক যুৱতীক । একমাত্ৰ কাগজ কলমতে হস্ততাঁত আৰু বস্ত্ৰ প্ৰশিক্ষণ উদ্যোগটোক জীয়াই ৰাখি বিভাগটোৰ এচাম দুৰ্নীতিগ্ৰস্থ বিষয়াই প্ৰশিক্ষণৰ নামত ধন আত্মসাতৰ অভিযোগ উত্থাপন হৈছে৷
