মঙলদৈ, 7 ছেপ্টেম্বৰ: দুৰ্নীতিগ্ৰস্ত কৰ্মচাৰীৰ বিৰুদ্ধে শেহতীয়াকৈ অধিক তৎপৰ হোৱা দেখা গৈছে মুখ্যমন্ত্ৰীৰ দুৰ্নীতি নিবাৰক আৰু তদাৰকী শাখা (Operation against corruption)৷ ইতিমধ্যে ঘোচ লৈ হাত-লোটে ধৰা পৰিছে বহুকেইগৰাকী চৰকাৰী কৰ্মচাৰী ৷ এই ঘোচখোৰ কৰ্মচাৰীৰ তালিকাত উচ্চ পদস্থ বিষয়াৰ পৰা বিদ্যালয়ৰ শিক্ষকলৈকে বহুতৰে নাম সন্নৱিষ্ট হৈছে (corrupted govt employee arrested) ৷ বৰ্তমানলৈকে প্ৰায় অৰ্ধ শতাধিক এনে দুৰ্নীতিগ্ৰস্ত কৰ্মচাৰীক গ্ৰেপ্তাৰ কৰা হৈছে ৷
বুধবাৰে, দৰং জিলাৰ পাথৰিঘাট চক্ৰ বিষয়াৰ কাৰ্যালয়ত উৎকোচ লৈ গ্ৰেপ্তাৰ হ’ল এজন লাট মণ্ডল (Lat mondal caught red handed) ৷ গ্ৰেপ্তাৰ হোৱা লাটমণ্ডল গৰাকীৰ নাম হৰি দাস সিনহা ৷ মুখ্যমন্ত্ৰীৰ দুৰ্নীতি নিবাৰক আৰু তদাৰকী শাখাই 18 হাজাৰ টকা উৎকোচ লওঁতেই গ্ৰেপ্তাৰ কৰে লাট মণ্ডল হৰি দাস সিনহাক ৷
ইয়াৰ পূৰ্বে যোৱা তিনি ছেপ্টেম্বৰত নগাঁও জিলাৰ কচুৱাত উৎকোচ লৈ গ্ৰেপ্তাৰ হৈছিল কচুৱা থানাৰ উপ পৰিদৰ্শক অনুপ কাকতি ৷
যোৱা 26 আগষ্টতো একেদিনাই দুৰ্নীতি নিবাৰক শাখাই ঘোচ লোৱাৰ অপৰাধত কৰিমগঞ্জত এজন লাট মণ্ডল আৰু ধুবুৰীত এজন সৰ্ব শিক্ষা অভিযান মিছনৰ জিলা প্ৰকল্প বিষয়াক গ্ৰেপ্তাৰ কৰে ৷ তাৰ আগ দিনা অৰ্থাৎ 25 আগষ্টত একে অপৰাধত গ্ৰেপ্তাৰ হয় ধেমাজি জিলা পৰিবহন বিষয়াৰ কাৰ্যালয়ৰ এজন কৰ্মচাৰী ৷
একেদৰে 24 আগষ্টত গ্ৰেপ্তাৰ হয় বিশ্বনাথ জিলা উপায়ুক্ত কাৰ্যালয়ৰ এজন কৰ্মী ৷ এইদৰে প্ৰায় প্ৰতিদিনেই ৰাজ্যত গ্ৰেপ্তাৰ হ’বলৈ ধৰিছে ঘোচখোৰ চৰকাৰী বিষয়া ৷ কিন্তু তাৰ পাচতো এই অভিযান দেখি যেন একাংশৰ গা লৰা নাই ৷
লগতে পঢ়ক: শিৱসাগৰত আদালতৰ পৰাই ভলুকা চোৰৰ পলায়ন
