দলগাঁও,20 এপ্ৰিল: ৰাজ্যৰ বিভিন্ন প্ৰান্তৰ লগতে দৰঙতো দৈনিক দ্ৰুতগতিত বৃদ্ধি পাইছে কৰ'ণা আক্ৰান্তৰ সংখ্যা । জিলাখনত পুনৰ ক’ভিড ১৯ ৰ দ্বিতীয়টো ঢৌৱে ভয়াৱহ ৰূপ ধাৰণ কৰাৰ পূৰ্বে সষ্টম হৈ পৰিছে জিলা প্ৰশাসন ৷ জিলাখনত কৰ’ণাৰ ভয়াবহতাৰ প্ৰতি লক্ষ্য ৰাখি খাৰুপেটীয়া নগৰৰ ১৫ নং ৰাষ্ট্ৰীয় ঘাইপথত খাৰুপেটীয়া পৌৰসভাৰ কাৰ্যবাহী বিষয়া শৰৎ গগৈয়ে খাৰুপেটীয়া আৰক্ষীৰ সহযোগত মাস্ক পৰিধান নকৰা লোকসকলৰ বিৰুদ্ধে অভিযান চলায় । অভিযানত ক’ভিড প্ৰটকল অমান্য কৰি মাস্ক পৰিধান নকৰা লোকৰ বিৰুদ্ধে জৰিমনা বিহে আৰক্ষীয়ে । লগতে ক’ভিডৰ সকলো নীতি-নিয়ম মানি চলাৰ বাবে ৰাইজক আহ্বান জনায় ।
উল্লেখযোগ্য যে, সোমবাৰে খাৰুপেটীয়া আৰক্ষীয়ে মাস্ক পৰিধান কৰাৰ লগতে সামাজিক দুৰত্ব বজাই ৰাখিবলৈ খাৰুপেটীয়া নগৰৰ লগতে বিভিন্ন অঞ্চলত মাইকযোগে ঘোষণা কৰি ৰাইজক আহ্বান জনায় ৷ উক্ত নিৰ্দেশ উলংঘাকাৰীৰ বিৰুদ্ধে কঠোৰ পদক্ষেপ গ্ৰহণ কৰা হ’ব বুলি সকীয়নি দিয়ে আৰক্ষীয়ে ।
ইফালে জিলাখনৰ স্বাস্থ্য বিভাগে জিলা তথ্য আৰু জনসংযোগ কাৰ্যালয়লৈ প্ৰেৰণ কৰা এক প্ৰেছ বিজ্ঞপ্তিৰ মতে, সোমবাৰে দিনত জিলাখনত ৩২ জন লোকৰ দেহত ধৰা পৰিছে ক'ভিড-১৯ ৰ অৱস্থিতি । এইসকলক ধৰি চলিত বৰ্ষৰ জানুৱাৰীৰ পৰা দৰঙত ক'ভিডত আক্ৰান্ত হোৱা লোকৰ সংখ্যা ১৩১ জনলৈ বৃদ্ধি পায় । এইসকলৰ ভিতৰত সম্প্ৰতি ৯৪ জন লোকেই হৈ আছে চিকিৎসাধীন ।
লগতে পঢ়ক : কৰ’ণা ভাইৰাছত আক্ৰান্ত কংগ্ৰেছ নেতা ৰাহুল গান্ধী
