দলগাঁৱৰ এখন বিদ্যালয়ত বিছাতংক

বিছাৰ আতংকত থৰ হৰি কম্পমান দলগাঁৱৰ এখন বিদ্যালয়ৰ ছাত্ৰ ছাত্ৰী ৷ য'ত ত'ত বিছাৰ মুক্ত বিচৰণে ব্যাঘাত জন্মাইছে বিদ্যালয়ৰ নিয়মীয়া পাঠদানত ৷

দলগাঁৱ, 3 আগষ্ট : দৰঙ জিলাৰ দলগাঁও শিয়ালমাৰী শিক্ষা খন্ডৰ অন্তগৰ্ত পূব বাইগৰমাৰী দক্ষিণ প্ৰাথমিক বিদ্যালয়ত বানৰ পাছত এতিয়া বিছাৰ আতংক ৷ বিদ্যালয়খনত এতিয়া যেনিয়েই চোৱা যায় তেনিয়েই কেৱল বিছাৰ বিচৰণ ৷ এমাহ গ্ৰীষ্ম বন্ধৰ পাচত শ্ৰেণী কোঠাত উপস্থিত হৈ অসংখ্য বিছা দেখি আতংকিত হৈ পৰে ছাত্ৰ-ছাত্ৰী তথা শিক্ষক শিক্ষয়িত্ৰী সকল ৷ শ্ৰেণী কোঠা , কাৰ্যালয় , ৰান্ধনী ঘৰ সকলোতে বিছাৰ সন্ত্ৰাস ৷

ভয়তে শ্ৰেণী কোঠা এৰি বাহিৰলৈ ওলাই আহিবলৈ বাধ্য হৈছে ছাত্ৰ ছাত্ৰী সকল ৷ বিদ্যালয়ৰ পাঠদানত ব্যঘাত জন্মোৱা বিছাৰ পৰা পৰিত্ৰাণ বিচাৰি এতিয়া শংকিত হৈ পৰিছে বিদ্যালয় কতৃপক্ষ ৷ ছাত্ৰ ছাত্ৰী সকলৰ মতে হাবি জংঘলৰ পৰা আহিছে এইবিধ বিশেষ বিছা ৷ বিছাৰ আক্ৰমণৰ পৰা ৰক্ষা পাবলৈ শিক্ষক শিক্ষয়িত্ৰী সকলে নিজাববীয়াকৈ প্ৰাথমিক ব্যৱস্থা হাতত লৈছে যদিও এতিয়ালৈকে বিছামুক্ত হোৱা নাই বিদ্যালয়ৰ চৌহদ ৷