দৰং, 13 অক্টোবৰ: মঙলবাৰে মঙলদৈৰ সনাতন ধৰ্ম মন্দিৰত অনুষ্ঠিত হয় ভাৰতীয় জনতা যুৱ মৰ্চা দৰং জিলা সমিতিৰ এখন কাৰ্যনিৰ্বাহক সভা ৷ সভাখনত অংশগ্ৰহণ কৰে বিজেপিৰ ৰাষ্ট্ৰীয় সম্পাদক তথা মঙলদৈ লোকসভা সমষ্টিৰ সাংসদ দিলীপ শইকীয়া ৷ সভাখনৰ অন্তত সাংবাদিকৰে হোৱা বাৰ্তালাপত সাংসদ গৰাকীয়ে কয় যে,যুৱ মৰ্চা হৈছে ভাৰতীয় জনতা পাৰ্টীৰ লাইখুটা ৷ যাৰ বাবে আগন্তুক দিনত তেওঁলোকক শক্তিশালী কৰাৰ ক্ষেত্ৰত উৎসাহ প্ৰদান কৰাৰ অৰ্থে সভাখন অনুষ্ঠিত কৰা হৈছে ৷ যুৱ শক্তিৰ নেতৃত্ব ৰাইজৰ মাজত দলটোক বিস্তাৰ কৰাত সহায় কৰিব বুলিও কয় তেওঁ ৷ আনহাতে তেওঁ কংগ্ৰেছৰ জ্যেষ্ঠ নেতা ৰিপুন বৰাকো কটাক্ষ কৰি কয় যে, তেওঁলোকৰ সপোন কেতিয়াও দিঠক নহয় ৷ কংগ্ৰেছ-এআইইউডিএফৰ মিত্ৰতাই কংগ্ৰেছক লাভান্বিত নকৰে, হয়তো ই এআইইউডিএফকহে কিছু লাভান্বিত কৰিব পাৰে ৷
ইয়াৰোপৰি তেওঁ নতুন ৰাজনৈতিক দলৰ বিষয়ে কয় যে, তেওঁলোকে কিছু অঞ্চলত কিছু ভোট লাভ কৰিলেও ভাৰতীয় জনতা পাৰ্টীৰ অপ্ৰতিৰোধ্য গতিক স্তব্ধ কৰিব নোৱাৰে ৷ আনহাতে তেওঁ এছ.আই কাণ্ড সন্দৰ্ভত কয় যে, এছ.আই কেলেংকাৰী কেতিয়াও হোৱাই নাছিল ৷ যাৰ বাবে আৰম্ভণিতে সকলোবোৰ পোহৰলৈ আহিল ৷ যাৰ বাবে মুখ্যমন্ত্ৰী সোণোৱালে দিল্লীত থকাৰ বাবে তাৰ পৰাই পৰীক্ষা বাতিল কৰাৰ লগতে তদন্ত কৰিবলৈ নিৰ্দেশ প্ৰদান কৰে ৷ এই ঘটনাৰ সৈতে জড়িত থকা সকলো লোককে তদন্তৰ আওতালৈ আনিব লাগে, সেইয়া লাগিলে বিজেপিৰ লোকেই নহওক কিয় ৷
লগতে পঢ়ক: সাংবাদিক অনিমেষ বৰ্মনক আক্ৰমণৰ বিৰুদ্ধে নলবাৰীত প্ৰতিবাদ
