দৰং, ৩ নৱেম্বৰ : এগৰাকী বিধায়কে জিলা আয়ুক্তলৈ লিখা এখন চিঠিয়ে এতিয়া তীব্ৰ জোকাৰণি তুলিছে দৰং জিলা প্ৰশাসনৰ ভিতৰে বাহিৰে । বিধায়ক বসন্ত দাসে জিলাখনত থকা যৌন কৰ্মীৰ সবিশেষ তথ্য বিচাৰি লিখা এখন চিঠিয়ে এতিয়া ব্যাপক প্ৰতিক্ৰিয়াৰ সৃষ্টি কৰিছে । পিছে হঠাতে বিধায়কগৰাকীৰ যৌন কৰ্মীৰ তথ্য বিচাৰি কিয় এই তৎপৰতা !
আচলতে দৰং জিলা ভৰি আছে ৬১৬ গৰাকী যৌন কৰ্মীৰে । শুনি আচৰিত যেন লাগিলেও খোদ জিলা প্ৰশাসনৰ তথ্যত উন্মোচন হৈছে এই সংখ্যা । পিচে এই তথ্যক লৈ সাধাৰণ ৰাইজৰ কথাটো বাদেই খোদ শাসকীয় দলৰ বিধায়কো আশ্বস্ত নহয় । যৌন কৰ্মীৰ এই বৃহৎ সংখ্যা উন্মোচিত হ’লেও দৰং প্ৰশাসনে প্ৰকাশ কৰিব পৰা নাই সবিশেষ ।
উল্লেখযোগ্য যে, এই বাণিজ্যিক যৌন কৰ্মীসকলৰ ভৰণ পোষণৰ নামত দৰং জিলা প্ৰশাসনে ব্যয় কৰিছে প্ৰায় ১৫ লাখ টকা । এই বিশাল সংখ্যাৰ যৌন কৰ্মীক ক’ভিডৰ সময়ছোৱাত খাদ্য যোগান ধৰাৰ নামত দৰং জিলা প্ৰশাসনে মুঠ ১৫ লাখ টকা ব্যয় কৰা বুলি শেহতীয়াভাৱে প্ৰকাশ পোৱাৰ পিচতে সমগ্ৰ জিলা জুৰি সৃষ্টি হৈছে প্ৰতিক্ৰিয়াৰ ।
তথ্য অনুসৰি, ২০২০–২০২১ বৰ্ষত দুই লাখ ৫০ হাজাৰ টকা আৰু ২০২১–২০২২ বৰ্ষত ১২ লাখ ৩৩ হাজাৰ ২৩২ টকাসহ মুঠ ১৪, ৮৩, ২৩২ টকা এই যৌন কৰ্মীৰ নামত ব্যয় কৰা হৈছে । কিন্তু প্ৰশাসনৰ এই তথ্য কোনো কাৰণতে সহজভাৱে ল’ব পৰা নাই সাধাৰণ ৰাইজে ।
ইফালে প্ৰশাসনে প্ৰকাশ কৰা এই তথ্যত জাঙুৰ খাই উঠিছে খোদ শাসকীয় দলৰেই বিধায়ক ড৹ পৰমানন্দ ৰাজবংশী । বিশেষকৈ যদি এয়া প্ৰকৃতাৰ্থত সঁচা হয় তেতিয়া দৰংবাসীৰ বাবেই বিষয়টো অতি লজ্জাজনক আৰু চিন্তনীয় বুলি উল্লেখ কৰে ড৹ পৰমানন্দ ৰাজবংশী । যাৰ বাবে এই তথ্য সবিস্তাৰে প্ৰকাশ কৰিব লাগিব বুলিও দাবী কৰে তেওঁ । এইটো দৰঙৰ আত্মসন্মানৰ লগত জড়িত বিষয় বুলি দোহাৰি এনে এটা স্পৰ্শকাতৰ বিষয় সহজতে এৰি দিব নোৱাৰি বুলি প্ৰকাশ কৰে ৰাজবংশীয়ে ।
আনহাতে, জানিব পৰা মতে, বিধায়ক বসন্ত দাসে ইতিমধ্যে সবিশেষ তথ্য বিচাৰি জিলা আয়ুক্তলৈ এখন পত্ৰ প্ৰেৰণ কৰিছে যদিও তথ্য প্ৰকাশ কৰা নাই প্ৰশাসনে । এনে ক্ষেত্ৰত সমগ্ৰ বিষয়টোত এটা বৃহৎ কেলেংকাৰী সংঘটিত হোৱা বুলি দৰং জিলা প্ৰশাসনৰ বিৰুদ্ধে গুৰুতৰ অভিযোগ উত্থাপন হৈছে ।
এইক্ষেত্ৰত বছৰ বছৰ ধৰি জিলা আয়ুক্তৰ কাৰ্যালয়ৰ চকী খামুচি থকা একাংশ ঘোচখোৰ কৰ্মচাৰীৰ প্ৰতি পোনপটীয়া অভিযোগ উত্থাপন হৈছে । এনে ক্ষেত্ৰত চৰ্চিত হোৱা বিষয়টো হ’ল জিলাখনত প্ৰকৃতাৰ্থত ইমান সংখ্যক স্বীকৃত যৌন কৰ্মী থকাটো সঁচানে ! জিলা প্ৰশাসনে সবিশেষ তথ্য প্ৰকাশ কৰি এই স্পৰ্শকাতৰ বিষয়টো পোহৰলৈ আনিব বুলি আশা কৰিছে ৰাইজে ।
লগতে পঢ়ক : Elephant attack: ভাতৃক হেৰুওৱাৰ বেদনা সহ্য কৰিব নোৱাৰিলে ককায়েকে
