চিৰাং, 17 ডিচেম্বৰ : সু-উচ্চ পাহাৰ মালাৰ মাজেৰে বৈ আহিছে কুলু কুলু সুৰেৰে এটি নিজৰা ৷ লগতে প্ৰকৃতিৰ অপৰূপ সৌন্ধৰ্যৰে পৰিপূৰ্ণ এক নিৰিবিলি অঞ্চল ৷ বিভিন্ন বন্য জীৱ-জন্তুৰে ভৰা এই অসম মুলুকৰে এখনি পৰ্যটন ক্ষেত্ৰ (Tourist place of Assam) ৷
আজি আমি আপোনালোকক লৈ যাম ভাৰত ভূটান সিমান্তত অৱস্থিত দৰ্শন আৰু আমোদ-প্ৰমোদৰ বাবে পৰিভ্ৰমণ কৰিব পৰা এখনি পৰ্যটন ক্ষেত্ৰলৈ ৷ নাম যাৰ কালামাটি পৰ্যটন ক্ষেত্ৰ (Tourist place Kalamati of Chirang) ৷ মানাহ ৰাষ্ট্ৰীয় উদ্যানৰ প্ৰথম সংযোজন আমটেকা বনাঞ্চলৰ অধীনৰ এই কালামাটি ৷ এই পৰ্যটন ক্ষেত্ৰখনিৰ লেখত ল’বলগীয়া এক বিশেষ বৈশিষ্ট হৈছে (Eco Tourism at Kalamati) ৷
ভাৰত-ভূটান সীমান্তত অৱস্থিত এটি সৰু পাহাৰ, যি কয়লা সদৃশ কলা মাটিৰে আৱৰি আছে আৰু নিশাৰ ভাগত এই মাটি ভক্ষণ কৰিবৰ বাবে অঞ্চলটোলৈ দৈনিক আহে প্ৰায় সংখ্যক বন্য জন্তু । সচৰাচৰ ইয়াত দেখা পোৱা বন্যজন্তুসমূহৰ ভিতৰত বাঘ, হৰিণা, নলগাহৰি, বনৰীয়া হাতী অন্যতম ৷
বনাঞ্চলখনত কেৱল ক’লা মাটিয়েই যে আছে এনে নহয়, ইয়াত আছে এক বিনন্দীয়া সৌন্ধৰ্যৰে ভৰপুৰ বগা মাটি আৰু ৰঙীন মাটিৰ বহু শৃংগ, য’ত পৰ্যটকসকলে এখনি ছেল্ফি উঠিবৰ বাবে কৰে হেতা ওপৰা ৷ অৱশ্যে মানুহৰ কোলাহলৰ বাবে এই বনাঞ্চলখনলৈ দিনৰ ভাগত বন্য জন্তুসমূহ নাহে যদিও কেতিয়াবা হঠাৎ দৃষ্টিগোচৰ হয় মানাহৰ এইসমূহ বন্য জন্তু ।
সেয়েহে বনভোজ অথবা দৰ্শনৰ বাবে অহা পৰ্যটকসকলৰ ক্ষেত্ৰত উচ্চ প্ৰাবল্যত গান বজোৱা, জুই জ্বলোৱা,গাড়ীৰ হৰ্ণ বজোৱা আদি ক্ষেত্ৰত নিষেধাজ্ঞা আৰোপ কৰি থৈছে বন বিভাগে ৷ চুবুৰীয়া ৰাষ্ট্ৰ ভূটানৰ পাহাৰসমূহেৰে চাৰিওদিশ আৱৰা কালামাটিৰ প্ৰাকৃতিক সৌন্ধৰ্য বৰ্ধন কৰিছে সেই স্থানেৰে পাৰ হৈ যোৱা কানামাক্ৰা নামৰ নৈখনে ।
লগতে পঢ়ক : Assam tourism: শিৱসাগৰলৈ আহি অভিভূত এটা বিদেশী দম্পত্তি
ইয়াৰ লগতে ভূটানৰ সুউচ্চ পাহাৰ মালাৰ বিনন্দীয়া দৃশ্যই প্ৰতিপল হাত বাউলি মাতে সকলোকে ৷ শুকুৰবাৰে বিটিআৰৰ পৰ্যটন বিভাগৰ উদ্যোগত পৰ্যটকৰ বাবে আনুষ্ঠানিকভাৱে উদ্বোধন কৰে বিটিআৰৰ বন আৰু পৰ্যটন বিভাগৰ কাৰ্যবাহী সদস্য ধৰ্মনাৰায়ণ দাসে ।
চিৰাং জিলাৰ 27 নং ৰাষ্ট্ৰীয় ঘাইপথৰে ছাপাগুৰীৰ পৰা পোনে পোনে উত্তৰৰ আমগুৰি আৰু কয়লা-ময়লা হৈ 46 কি:মি: পথ সোমাই গ’লেই পোৱা যায় ভাৰত ভূটান সীমান্তত অৱস্থিত কালামাটি । অৱশ্যে কালামাটিৰ জৈৱ বৈচিত্ৰ ৰক্ষাৰ প্ৰতি লক্ষ্য ৰাখি বনাঞ্চলখন পৰ্যটকৰ বাবে যিমান উন্নত কৰিব লাগিছিল সেই অনুপাতে কৰিব পৰা নাই ৷ এই কথা জনালে বিটিআৰৰ বন আৰু পৰ্যটন বিভাগৰ কাৰ্যবাহী সদস্যগৰাকীয়ে ৷
পৰ্যটকৰ সুবিধাৰ প্ৰতি লক্ষ্য ৰাখি পৰ্যটন ক্ষেত্ৰখনক অধিক উন্নত কৰিবলগীয়া হ’লে ইয়াৰ বন্য জন্তুসমূহে অসুবিধাত পৰাৰ লগতে বনাঞ্চলখনৰ প্ৰাকৃতিক সৌন্ধৰ্যও বিনষ্ট হোৱাৰ সম্ভাৱনা অধিক । সেয়ে পৰ্যটন ক্ষেত্ৰখনৰ ভাৰসাম্য ৰক্ষা কৰি তাক যিধৰনে আছে সেই ধৰণেই ৰাখি কালামাটি পৰিভ্ৰমণলৈ অহা পৰ্যটকসকলৰ বাবে কয়লা-ময়লাত থকা-খোৱাৰ সুবিধাৰ লগতে বিশেষ অতিথিশালাৰ ব্যৱস্থা কৰিব বুলি জনালে কাৰ্যবাহী সদস্যগৰাকীয়ে ।
প্ৰতি বছৰৰ নৱেম্বৰৰ পৰাই অসমৰ বিভিন্ন প্ৰান্তৰ পৰা পৰ্যটক আহিবলৈ আৰম্ভ কৰে কালামাটিলৈ । অৱশ্যে মানাহৰ অন্য প্ৰান্তৰ তুলনাত কালামাটিৰ প্ৰচাৰ কম হোৱাৰ হেতুকে পৰ্যটন ক্ষেত্ৰখনত পৰ্যটকৰ সমাগম তুলনামুলক ভাৱে কম দেখা যায় ।
লগতে পঢ়ক : Migratory Birds at Moribil: পৰিভ্ৰমী পক্ষীৰ কলৰৱত মুখৰ মৰিগাঁৱৰ মৰিবিল
