চিৰাং, 14 জুন: বিগত কেইবাদিনো ধৰি সামাজিক মাধ্যমত প্ৰচাৰ লাভ কৰি আহিছে চুম্বক মানৱে ৷ এই চুম্বক মানৱ কোনো ভগৱান প্ৰদত্ত ঐচ্ছৰিক গুণৰ অধিকাৰী নহয় ৷ এচামৰ মতে, এই চুম্বক মানৱৰ আবিৰ্ভাৱ হৈছে ক’ভিড-19ৰ ভেকচিন গ্ৰহণৰ পাছতে ৷
এই লৈ যোৱা কেইবাদিনো ধৰি ছচিয়েল মিডিয়াত ভাইৰেল হৈছে বহু ফটো ভিডিঅ’ আৰু ফটো ৷ এই ফটো বোৰত প্ৰকাশ কৰা অনুসৰি ভেকচিন লোৱাৰ পাচত একাংশ লোকৰ দেহত ধৰা পৰিছে চুম্বকীয় শক্তিৰ ৷
উল্লেখযোগ্য যে,শেহতীয়াকৈ এই চুম্বক মানৱৰ আৱিৰ্ভাৱ হৈছে অসমতো ৷ অসমৰ চিৰাং জিলাত সংঘটিত হৈছে এই অবিশ্বাস্য ঘটনা ৷ বিজনীৰ কাৱাটীকাৰ শিৱশংকৰ অধিকাৰী নামৰ এজন লোকৰ দেহত চামুচ, হেতা, মুদ্ৰা, খন্তি আদি লাগি ধৰাত এই লৈ তীব্ৰ চাঞ্চল্যৰ সৃষ্টি হৈছে ৷ এই কাণ্ড দেখি আচৰিত হৈ পৰিছে স্থানীয় লোকসকল ।
বিজনী ভেটাগাঁৱৰ নৱাৰূণ স্কুলৰ বিজ্ঞান শিক্ষক অধিকাৰীয়ে কিছু দিন পূৰ্বে ক’ভিড-19 ৰ ভেকচিন গ্ৰহণ কৰিছিল ৷ বিভিন্ন ঠাইৰ খবৰৰ পাচতেই ভেকচিনৰ বাবেই এই শক্তি বিভিন্ন জনৰ দেহত সৃষ্টি হোৱা বুলি জানিব পৰাত শিৱশংকৰ অধিকাৰীয়ে নিজৰ দেহতো এই পৰীক্ষা চলাইছিল ৷ ইয়াৰ পাচতেই তেওঁৰ দেহত লাগি ধৰিছিল স্টীলকে ধৰি বিভিন্ন সামগ্ৰী ৷
অৱশ্যে শিক্ষকজনৰ মতে এয়া কোনো ভেকচিন লোৱাৰ বাবে ঘটা নাই ৷ সাধাৰণতে একাংশ মানুহৰ দেহত এক ধৰণৰ মেগনেটিক পাৱাৰ থাকে, যাৰ ফলত এই ধৰণৰ ষ্টীল জাতীয় সামগ্ৰী দেহত লাগি ধৰে । তেখেতে জানিবলৈ দিয়া মতে, প্ৰায় 7 বছৰ পূৰ্বেও বিজ্ঞান শিক্ষকজনৰ গাত এনে চুম্বকীয় শক্তি ধৰা পৰিছিল ৷ ভেকচিনেচনৰ কাৰণে এই চুম্বকীয় শক্তি লাভ কৰাৰ কথা অস্বীকাৰ কৰে শিক্ষক গৰাকীয়ে ৷
