চিৰাং,12 জুলাই: শনিবাৰে মাজনিশাৰ পৰা আতংকত ক্ষণ পাৰ কৰিছে চিৰাঙৰ বাসুগাঁৱবাসীয়ে ৷ অঞ্চলটোত হঠাতে উদ্ভৱ হোৱা পেট্ৰ’লজাতীয় তেলৰ গোন্ধ চৌদিশে বিয়পি পৰাত সৃষ্টি হৈছে এই আতংকৰ ৷ ইতিমধ্য়ে অঞ্চলবাসীয়ে বাসুগাঁৱৰ মাজেৰে যোৱা অইল ইণ্ডিয়াৰ তেলৰ পাইপ ফাটি এই তেল নিৰ্গত হোৱাৰ সন্দেহ প্ৰকাশ কৰিছে যদিও বৰ্তমান পৰ্যন্ত প্ৰকৃত সত্য় উদঘাটন কৰিবলৈ সমৰ্থ হোৱা নাই ৷ ইফালে আতংকিত জনতাই দিয়া খবৰৰ ভিত্তিত স্থানীয় অগ্নি নিৰ্বাপক বাহিনী ঘটনাস্থলীত উপস্থিত হৈ অনুসন্ধান আৰম্ভ কৰে যদিও এইপৰ্যন্ত কোনো তথ্য লাভ কৰিব পৰা নাই ৷
উল্লেখ্য যে, বাসুগাঁৱৰ মাজেৰে চম্পাৱতী নদী বৈ গৈ ব্ৰহ্মপুত্ৰত মিলিত হৈছে ৷ যদিহে ৰাইজৰ সন্দেহ সঁচা বুলি প্ৰমাণিত হয় তেন্তে যিকোনো মুহুৰ্তত অগ্নিকাণ্ডৰ সূত্ৰপাত হৈ পৰিস্থিতি ভয়াৱহ হোৱাৰ আশংকা প্ৰকাশ কৰা হৈছে ৷ ইফালে, চিৰাং-কোকৰাঝাৰ জিলা দুখনৰ সীমান্তৰে বৈ যোৱা চম্পাৱতী নৈতো এই গোন্ধ বিয়পি পৰাৰ কথা ৰাইজে ইতিমধ্যে প্ৰকাশ কৰিছে ৷ তদুপৰি উক্ত নৈৰ বুকুৱেদি নুমলীগড়ৰ পৰা শিলিগুৰি হৈ হলডিয়ালৈকে অইল ইণ্ডিয়াৰ পাইপ লাইন পাৰ হৈ গৈছে ।
আতংকিত জনসাধাৰণে দুয়োখন জিলাৰ প্ৰশাসনক বিষয়টো অৱগত কৰাত প্ৰশাসনৰ শীৰ্ষ বিষয়াসকল আহি ঘটনাস্থলী পৰিদৰ্শন কৰে ৷ ইপিনে বিগত কেইবাদিনৰ পৰা জিলাখনত হৈ থকা অতিপাত বৰষুণৰ ফলত নৈৰ পানী ফেন-ফোটোকাৰে বঢ়াত কোনোধৰণৰ ব্যৱস্থা গ্ৰহণ কৰিব পৰা নাই প্ৰশাসনে ৷ সেয়ে অঞ্চলটোত যিকোনো সময়তে ভয়ংকৰ বিপদ ঘটাৰ আশংকা নুই কৰিব নোৱাৰি ৷
লগতে চাওকঃ কপিলীৰ বানত জলমগ্ন হোজাইৰ বিস্তীৰ্ণ অঞ্চল
