চিৰাং,9 মে’ঃ চিৰাঙৰ সীমান্তৱৰ্তী ৰুণিখাটা থানাৰ অন্তৰ্গত তথা দাদগিৰি সীমান্ত আৰক্ষী চকীৰ সমীপৰ দেউশ্ৰী গণেশপুৰত উদ্ধাৰ হৈছে নাবালিকাৰ মৃতদেহ ৷ ঘটনাৰ বিৱৰণী অনুসৰি, বৃহস্পতিবাৰে সন্ধিয়া নিদ্ৰাৰত অৱস্থাত এগৰাকী ন বছৰীয়া কিশোৰীক এৰি মাহীমাকে চুবুৰীয়াৰ ঘৰলৈ যায় ৷ পৰৱৰ্তী সময়ত ঘূৰি আহি কিশোৰীগৰাকীক ঘৰত নেদেখি হুলস্থুল কৰাত গাঁৱবাসীয়ে নিশা কিশোৰীগৰাকীক বিচাৰে যদিও সন্ধান উলিওৱাত ব্যৰ্থ হয় ৷ উপায়ন্তৰ কিশোৰীগৰাকীৰ অভিভাৱকে দাদগিৰি সীমান্ত আৰক্ষী চকীত এইবিষয়ে অৱগত কৰাত আৰক্ষীয়ে গাঁৱবাসীৰ সহযোগত কিশোৰীগৰাকীৰ সন্ধানত নামি পৰে ৷
ইপিনে, শনিবাৰে পুৱা প্ৰায় 9 বজাত গাঁৱখনৰ সমীপৰ হাবিত ছোৱালীজনীৰ কাপোৰ উদ্ধাৰ কৰে স্থানীয় ৰাইজে । এই বিষয়ে আৰক্ষীয়ে সম্ভেদ লাভ কৰি হাবিত অভিযান চলোৱাত বিবস্ত্ৰ অৱস্থাত উদ্ধাৰ হয় কিশোৰী গৰাকীৰ মৃতদেহ । অপহৰণৰ তিনিদিন পিছত উদ্ধাৰ হোৱা কিশোৰী গৰাকীৰ মৃতদেহক কেন্দ্ৰ কৰি স্থানীয় লোকে এয়া এক হত্যাকাণ্ড বুলি দাবী কৰে ৷ কিশোৰী গৰাকীক দুৰ্বৃত্তই ধৰ্ষণ কৰি হত্যা কৰাৰ সন্দেহ প্ৰকাশ কৰিছে আৰক্ষীয়ে ৷ উল্লেখ্য যে, বিগত কিছুদিনত লক্ ডাউনৰ মাজতে বৃদ্ধি পাইছে বিভিন্ন অপৰাধমূলক ঘটনা । ইতিপূৰ্বে ৰুণিখাটা এলেকাত প্ৰায় একে ধৰণৰ অন্য তিনিটা ঘটনা সংঘটিত হৈছে । একাংশ লোকৰ মদ্যপানৰ ফলতে এইধৰণৰ অপৰাধমূলক ঘটনা বৃদ্ধি পাইছে চিৰাঙত ৷
আনহাতে,মৃতদেহ উদ্ধাৰৰ পিচতে ঘটনাস্থলীত চিৰাং জিলাৰ অতিৰিক্ত আৰক্ষী অধীক্ষক বেদান্ত প্ৰকাশ বৰকাকতি, জিলা সদৰৰ উপ-আৰক্ষী অধীক্ষক প্ৰতাপ দাস, ৰুণিখাটাৰ চক্ৰ আৰক্ষী বিষয়া ৰুস্থমৰাজ ব্ৰহ্মকে ধৰি ৰুণিখাটা থানা আৰু দাদগিৰি সীমান্ত আৰক্ষী চকীৰ আৰক্ষী উপস্থিত হৈ সীমান্ত সুৰক্ষা বাহিনী আৰু সেনাৰ চোৰাংচোৱা কুকুৰৰ সহযোগত প্ৰাথমিক তদন্ত আৰম্ভ কৰিছে ।
লগতে চাওকঃ কৰ’ণা মুক্ত গোলাঘাট জিলা !
