চিৰাং, 17 ডিচেম্বৰ: ৰাজ্যত ক্ৰমাত জটিল ৰূপ ধাৰণ কৰিছে হাতী-মানুহৰ সংঘাতে ৷ চিৰাঙৰ দংশীয়াপাৰাত অব্যাহত আছে বনৰীয়া হাতীৰ তাণ্ডৱ ৷ সঘনাই অঞ্চলটোত এজাক বনৰীয়া হাতীয়ে খাদ্যৰ সন্ধানত ওলাই আহি শ শ বিঘা কৃষি ভূমি গচকি-খাই তহিলং কৰাৰ লগতে ঘৰ-দুৱাৰ ভাঙি লণ্ডভণ্ড কৰে ৷ বিগত কিছুদিন ধৰি দিনে নিশাই বিচৰণ কৰি আছে তিনি চাৰিজনীয়া বন্যহস্তীৰ জাকেটোৱে ৷ সম্প্ৰতি চৰম আতংকতৰ মাজৰে দিন অতিবাহিত কৰিছে অঞ্চলটোৰ ৰাইজে ৷
তাৰ মাজতে চিৰাং জিলাৰ বিজনী মহকুমাৰ অন্তৰ্গত কুকলুং বনাঞ্চলৰ ১নং দংশীয়া পাৰা গাঁৱত বনৰীয়া হাতীৰ জাকে মাজ নিশা সন্ত্ৰাস চলাই ছাইফুল ইছলাম, শুকুৰ আলী আৰু আফজাল আলীৰ ঘৰ ভাঙি লণ্ড ভণ্ড কৰে ৷ মানাহ ৰাষ্ট্ৰীয় উদ্যানৰ পৰা ওলাই অহা বনৰীয়া হাতীৰ জাকৰ আক্ৰমণত স্থানীয় লোক আহত হোৱাৰ লগতে নিহত হোৱাৰ ঘটনাও সংঘটিত হৈছে ৷ এই ক্ষেত্ৰত বন বিভাগে কোনো ধৰণৰ ব্যৱস্থা গ্ৰহণ নকৰাৰ অভিযোগ উঠিছে ৷
