চিৰাং, 24 আগষ্ট : চিৰাঙত সংঘটিত হৈছে এক মৰ্মান্তিক ঘটনা । চিৰাং জিলাৰ পানবাৰীৰ হাকোৱা নৈত গা ধুবলৈ গৈ সোমবাৰে নিৰুদ্দেশ হয় দুই ছাত্ৰ । পানবাৰীৰ ৰাণীঘাটত ভোজ খাবলৈ আহিছিল দহ জনীয়া ছাত্ৰৰ দলটো । এই স্থানৰ পৰ্যটনস্থলী সম্প্ৰতি বন্ধ আছিল আৰু এনে সময়ত দহ জনকৈ ছাত্ৰ কি দৰে উক্ত ঠাইত ভোজ খাবলৈ যোৱাৰ সুবিধা পালে সেই লৈ প্ৰশ্ন উত্থাপন হৈছে । যিহেতু পানবাৰী বন বিভাগৰ ৰানীঘাট বিট কাৰ্যালয়ৰ নিচেই কাষতে এই ঠাই । বন বিভাগে এই ক্ষেত্ৰত ছাত্ৰৰ দলটোক কিয় বাধা প্ৰদান নকৰিলে ? এই লৈ অঞ্চলটোত সৃষ্টি হৈছে চাঞ্চল্যৰ।
বিজনী বড়োবাজাৰ গাঁওৰ সুকুমাৰ বসুমতাৰীৰ পুত্ৰ সঞ্জয় বসুমতাৰী(১৭) আৰু নোৱাপাৰা গাঁৱৰ কেৰল দৈমাৰীৰ পুতেক ধৃতিৰাজ দৈমাৰী(১৮) । দুয়োজনেই উচ্চতৰ দ্বিতীয় বৰ্ষৰ ছাত্ৰ আছিল । গা ধুই থাকোতে দুয়ো বেছি পানীত নামি যোৱাত ডুবি থকা দেখি লগৰ ছাত্ৰ সকলে বচাবলৈ বহু চেষ্টা কৰা বুলি জনায় । তেওঁলোকে বহু চেষ্টা কৰিও বচাব নোৱাৰা বুলি সাংবাদিকৰ আগত মন্তব্য কৰে ।
এই ঘটনাৰ বিষয়ে অৱগত হোৱাৰ লগে-লগে পানবাৰী থানাৰ ভাৰপ্ৰাপ্ত বিষয়া উত্তম কুমাৰ দলে ঘটনাস্থলীত উপস্থিত হৈ স্থানীয় ৰাইজ আৰু পানবাৰী বন বিভাগৰ সহযোগত নিৰুদ্দেশ হোৱা ছাত্ৰ দুজনক বিচাৰি অভিযান অব্যাহত ৰাখিছে ।
সোমবাৰে বিয়লি ২ বজাত সংঘটিত হৈছে এই ঘটনা । এতিয়ালৈ উদ্ধাৰ অভিযান চলাই আছে অভিযানকাৰী দলে । ইতিমধ্যে মৃত অৱস্থাত নোৱাপাৰাৰ ধৃতিৰাজ দৈমাৰীৰ (১৮) মৃতদেহ উদ্ধাৰ কৰিছে যদিও বড়ো বাজাৰৰ সঞ্জয় বসুমতাৰী(১৭) উদ্ধাৰ হোৱা নাই ।
লগতে পঢ়ক : আৰক্ষীৰ জালত ধৃত মটৰচাইকেল চোৰ
