বিজনী, 12 এপ্ৰিল : সমগ্ৰ ৰাজ্যৰ লগতে চিৰাং জিলাৰ বিজনী আৰু বাসুগাঁৱৰ ৰেল ষ্টেচনত চিৰাং জিলাৰ বিজনীৰপৰা অহা যাত্ৰীক ক'ভিড পৰীক্ষা কৰি থকা হৈছে ৷ ক'ৰণা ভাইৰাছৰ দ্বিতীয় লহৰ আহি পোৱাত চিৰাং জিলাত স্বাস্থ্য বিভাগে পৰীক্ষণৰ ব্যৱস্থা গ্ৰহণ কৰাৰ পাছত সোমবাৰলৈকে মুঠ ২1 জন লোক ক'ভিড- ১৯ ত আক্ৰান্ত হোৱা বুলি জিলা স্বাস্থ্য বিভাগে প্ৰকাশ কৰিছে ৷ চিৰাং জিলাত যোৱা ২৫ মাৰ্চৰ পৰা পৰীক্ষা পুনৰ আৰম্ভ কৰা হৈছে ৷ চিৰাঙত ক'ভিড - ১৯ ৰ অৱস্থিতি ধৰা পৰা মুঠ ২1 জন ৰোগীৰ চাৰি জনক কাজলগাঁৱৰ জে এছ বি অসামৰিক চিকিৎসালয়ৰ আইচ'লেশ্যন কোঠাত ৰাখি চিকিৎসা প্ৰদান কৰি থকাৰ বিপৰীতে ১৮ গৰাকী লোকক হোম কোৱাৰেন্টাইনত ৰখা হৈছে ।
চিৰাং স্বাস্থ্য সেৱা বিভাগৰ জিলা ক'ভিড চাৰ্ভেইলেন্স বিষয়া ডাঃ দ্বীগেন ৰামছিয়াৰীয়ে প্ৰকাশ কৰা মতে, ১০ এপ্ৰিলত জিলাখনত ৫৮৪ জন লোকৰ ৰেপিড এণ্টিজেন টেষ্ট কৰাৰ পাছত আঠ জন লোকৰ দেহত কভিড-১৯ ৰ অৱস্থিতি ধৰা পৰিছে ৷ দেওবাৰে ৬১৮ জনৰ ৰেপিড এণ্টিজেন টেষ্ট কৰা হয় যদিও কোনো লোকৰ শৰীৰত ক'ভিড - ১৯ ৰ অৱস্থিতি ধৰা পৰা পৰিলক্ষিত হোৱা দেখা নাই । চিৰাঙৰ জিলা স্বাস্থ্য সেৱা বিভাগৰ জিলা টীকাকৰণ বিভাগৰ কাৰ্যালয় সহায়ক ভাস্কৰ ভট্টাচাৰ্যই প্ৰকাশ কৰা মতে, চিৰাং জিলাত এতিয়ালৈকে ১৭,৮৮২ জন লোকক ক'ভিশ্বীল্ড আৰু ১৯,১৪২ জনক ক'ভেক্সিন চিটা প্ৰদান কৰা হৈছে ।
এই প্ৰক্ৰিয়া স্বাস্থ্য বিভাগে অব্যাহত ৰাখিছে । দেশত উপলব্ধ হোৱা ক'ভিড-১৯ ৰ প্ৰতিৰোধী ঔষধ স্বীকৃতি লাভ কৰাৰ পাছতে ৰাজ্যখনলৈ অহা ক'ভিড-১৯ ৰ প্ৰতিৰোধী টীকা চিৰাং জিলাতো প্ৰদান কৰা হয় ৷ বিগত ১৬ জানুৱাৰীত জিলা সদৰ কাজলগাঁৱস্থিত জে এছ বি চিকিৎসালয়ত টীকাকৰণ প্ৰক্ৰিয়া আৰম্ভ কৰা হৈছিল আৰু তেতিয়াৰে পৰা বৰ্তমানলৈ অব্যাহত আছে প্ৰতিষেধক প্ৰদান প্ৰক্ৰিয়া । জিলা খনত সম্প্ৰতি ক'ভিড-১৯ ৰ প্ৰতিষেধক চিটা শেহতীয়া ভাৱে কিছু নাটনি চলিছে যদিও অহা সপ্তাহ মানে দূৰ হ'ব বুলি প্ৰকাশ কৰিছে স্বাস্থ্য বিভাগৰ বিষয়া জনে ।
লগতে পঢ়ক : শেষ আখৰাত ব্যস্ত ঔগুৰী কপহুৱা সোণৰ খাৰু জেংবিহু দল
