চিৰাং, 3 আগষ্ট : বুধবাৰে টকিঅ' অলিম্পিকৰ ছেমি ফাইনেলত অৱৰ্তীৰ্ণ হ'ব অসম কন্যা লাভলীনা বৰগোঁহাই ৷ ইয়াৰ বাবে সমগ্ৰ ৰাজ্যতে চলিছে ব্যাপক চৰ্চা ৷ সমান্তৰালকৈ লাভলীনাৰ জয়ৰ কামনাৰে ৰাজ্যৰ সৰ্বত্ৰে থকা মঠ-মন্দিৰ, নামঘৰ আদি ধৰ্মীয় উপাসনাস্থলীসমূহত নাম-প্ৰসংগ কৰা পৰিলক্ষিত হৈছে ৷ তাৰমাজতে চিৰাং জিলাৰ কাজলগাঁৱস্থিত যোগকেন্দ্ৰতো চিৰাং জিলা ক্ৰীড়া সন্থা আৰু জিলা ক্ৰীড়া বিষয়াৰ উদ্যোগত বন্তি প্ৰজ্বলন কাৰ্যসূচী ৰূপায়ণ কৰা দেখা যায় ।
বন্তি প্ৰজ্বলন কাৰ্যসূচীত জিলা ক্ৰীড়া বিভাগৰ বিষয়া দশৰথ ব্ৰহ্ম আৰু চিৰাং জিলা ক্ৰীড়া সন্থাৰ প্ৰাক্তন সভাপতি মনোলাল বসুমতাৰীৰ উপৰি জিলাখনৰ বিভিন্ন এলেকাৰ পৰা অহা উদীয়মান মহিলা খেলুৱৈসকল উপস্থিত থাকে ৷ লাভলীনাই বৰগোঁহাইয়ে বুধাবাৰে ছেমি ফাইনেলত যাতে জয়লাভ কৰে, তাৰ বাবে এগছিকৈ বন্তি প্ৰজ্বলন কৰি ইশ্বৰৰ ওচৰত প্ৰাৰ্থনা কৰে ।
লগতে পঢ়কঃ লাভলীনাৰ জয়ৰ কামনাৰে সৰুপথাৰৰ বাৰখেলীয়া নামঘৰত নাম-প্ৰসংগ
উল্লেখযোগ্য যে, চলিত টকিঅ' অলিম্পিক (Tokyo Olympics)ত অসম কন্যা লাভলীনা বৰগোঁহাই (Lovlina Borgohain)ৰ ছেমি ফাইনেল চাবলৈ বুধবাৰে 30 মিনিটৰ বাবে স্থগিত ৰখা হ’ব অসম বিধানসভা (Assam Assembly)ৰ সদনৰ কাৰ্যক্ৰমণিকা ৷
মহিলা বক্সিঙৰ 69 কেজিৰ ছেমি ফাইনেলত তুৰ্কীৰ ৱৰ্ল্ড চেম্পিয়ন বুচেনাজ চুৰমেনেলী (Busenaz Surmeneli)ৰ সৈতে মুখামুখি হ’ব অসম কন্যা লাভলীনা ৷ কোৱাৰ্টাৰ ফাইনেলত চাইনীজ টাইপেইৰ চেন নিয়েন চিন(Nien-Chin Chen of Chinese Taipei)ক পৰাস্ত কৰি লাভলীনাই ইতিমধ্যে ভাৰতক আন এটা অলিম্পিক পদকৰ আশ্বাস প্ৰদান কৰিছে ৷
লগতে পঢ়কঃ সংৰক্ষণ হ’ব ভূপেনদাৰ গীত-মাতৰ লগতে বিভিন্ন সাংস্কৃতিক উপাদান
