চিৰাং, 7 মাৰ্চঃ চিৰাঙৰ কাজলগাঁৱত নিৰ্মিত বড়োলেণ্ড অতিথিশালা উদ্বোধন কৰিলে বিটিচি প্ৰধান হাগ্ৰামা মহিলাৰীয়ে ৷ বৃহস্পতিবাৰে বিটিচিৰ গড়কাপ্তানি বিভাগৰ দ্বাৰা নিৰ্মিত অতিথিশালাটো মুকলি কৰাৰ লগতে এক ৰাজহুৱা সভাত অংশগ্ৰহণ কৰে হাগ্ৰামা মহিলাৰীয়ে ৷
অনুষ্ঠানত বিটিচিৰ উপ মুখ্য কাৰ্যবাহী সদস্য খাম্ফা বৰগয়াৰী, বিটিচিৰ মুখ্য সচিব বীৰেন ফুকন, অতিৰিক্ত মুখ্য সচিব ৰবিনচন মুছাহাৰী, চিৰাং জিলাৰ উপায়ুক্ত তথা বিটিচিৰ লগতে চিৰাং জিলাৰ বহুকেইগৰাকী উচ্চপদস্থ বিষয়া উপস্থিত থাকে ৷ আনহাতে ৰাজহুৱা সভাতে গড়কাপ্তানি বিভাগৰ ভাৰপ্ৰাপ্ত কাৰ্যবাহী অভিযন্তা প্ৰসন্ন বড়োৰ পৰা হঠাৎ মাইক্ৰ'ফোন কাঢ়ি লয় হাগ্ৰামা মহিলাৰীয়ে ৷ 20শতাংশ কাম কৰি 80 শতাংশ কাম হোৱা বুলি ধন মোকলাই লোৱাৰ অভিযোগ উত্থাপন কৰি বিটিচিত এনেকুৱা অভিযন্তাৰ দৰকাৰ নাই বুলি উল্লেখ কৰে হাগ্ৰামাই ৷ ৰাজহুৱা সভাতে বিটিচিৰ পৰা এনেধৰণৰ অভিযন্তাক সোনকালে বদলি কৰিব লাগে বুলি কয় বিটিচি প্ৰধানগৰাকীয়ে ৷
ৰাজহুৱা সভাত অংশগ্ৰহণ কৰি বিটিচিৰ প্ৰতিখন জিলা আৰু মহকুমাতে একোটাকৈ বিলাসী বড়োলেণ্ড অতিথিশালা নিৰ্মাণৰ কথা উল্লেখ কৰে বিটিচি প্ৰধান মহিলাৰীয়ে ৷ আনহাতে নিৰ্বাচনী আয়োগৰ নিৰ্বাচনী অধিসূচনা জাৰী কৰাৰ পিচতেই এইসমূহ কাম সম্পুৰ্ণ কৰাৰ কথা উল্লেখ কৰে মহিলাৰীয়ে ৷
সভাৰ অন্তত সাংবাদিকৰে সৈতে হোৱা বাৰ্তালাপত লোকসভা নিৰ্বাচন সন্দৰ্ভত কেতবোৰ গুৰুত্বপূৰ্ণ মন্তব্য কৰে বিটিচি প্ৰধানগৰাকীয়ে ৷ অহা 10 মাৰ্চত বিপিএফৰ কেন্দ্ৰীয় কাৰ্যনিৰ্বাহক অনুষ্ঠিত হ'ব আৰু তাতেই লোকসভা নিৰ্বাচনৰ বাবে প্ৰাৰ্থী বাচনি কৰিব দলটোৱে ৷ বিজেপিৰ সৈতে দলটোৰ মিত্ৰতা অক্ষুন্ন থাকিব আৰু কোকৰাঝাৰ সমষ্টিৰ পৰা বিপিএফে প্ৰতিদ্বন্দিতা কৰাৰ লগতে বাকীসমূহ সমষ্টিত বিজেপিৰ মিত্ৰজোটক সহায় কৰিব দলটোৱে ৷ মেঘালয়ৰ কনৰাড চাংমা বিষয়ে উল্লেখ কৰি মেঘালয়ৰ মানুহৰ আমাৰ ইয়াত কোনো কাম নাই কিন্তু মেঘালয়ৰ বিধানসভা নিৰ্বাচনত 5টাকৈ সমষ্টি হাগ্ৰামাৰ হাতত থকা বুলি মন্তব্য কৰে বিটিচি প্ৰধানগৰাকীয়ে ৷
লোকসভা নিৰ্বাচন সন্দৰ্ভত সাংবাদিকে সোধা প্ৰশ্নৰ উত্তৰত অসমৰ 14 খন আসনৰ 12খনেই বিজেপিয়ে জয় লাভ কৰিব বুলি উল্লেখ কৰে হাগ্ৰামা মহিলাৰীয়ে ৷ আনহাতে বাকী দুখন আসনৰ এখন কংগ্ৰেছ আৰু এখন বি পি এফে লাভ কৰিব বুলি কোৱাৰ লগতে এ আই ইউ ডি এফ আৰু অগপই এখনো আসন লাভ নকৰে বুলি কয় বিটিচি প্ৰধানগৰাকীয়ে ৷
