চিৰাং,1 মাৰ্চ: বঙাইগাঁৱৰ শাওনাগাঁৱত সংঘটিত হৈছে এক চাঞ্চল্যকৰ ঘটনা ৷ পিতৃগৃহৰ সন্মুখতে অৰ্ধ উলংগ অৱস্থাত উদ্ধাৰ হৈছে এগৰাকী মহিলাৰ মৃতদেহ ৷ মৃতদেহটো গায়ত্ৰী ৰায় নামৰ বিবাহিতা মহিলাগৰাকীৰ বুলি চিনাক্ত কৰা হৈছে ৷ অসংযত অৱস্থাত উদ্ধাৰ হোৱা মৃতদেহলৈ চাই মহিলাগৰাকী ধৰ্ষণৰ বলি হোৱা সন্দেহ প্ৰকাশ কৰিছে পৰিয়াল তথা স্থানীয় লোকে ।
আনহাতে, এই জঘন্য ঘটনাত গায়ত্ৰী ৰায়ৰ স্বামী জড়িত থকাৰ সন্দেহ প্ৰকাশ কৰিছে গায়ত্ৰীৰ পিতৃ হৰি ৰায়ে ৷ ইতিমধ্যে ঘটনাস্থলীত নিউ বঙাইগাঁও আৰক্ষী পহৰা চকীৰ এটা দল উপস্থিত হৈ মৃতদেহটো উদ্ধাৰ কৰি আৰম্ভ কৰিছে তদন্ত ।
উল্লেখ্য যে, গায়ত্ৰী ৰায় বিগত কিছুদিন ধৰি শাওনাগাঁৱস্থিত পিতৃগৃহত আছিল ৷ দেওবাৰে নিশা গায়ত্ৰীৰ পিতৃগৃহৰ পদূলিমুখত সংঘটিত হয় এই চাঞ্চল্যকৰ ঘটনা ৷ ঘটনাটোৱে বৰ্তমান সমগ্ৰ বঙাইগাঁৱতে চাঞ্চল্যৰ সৃষ্টি কৰিছে ।
লগতে পঢ়ক: দুদিনীয়া ভ্ৰমণসূচীৰে অসমলৈ প্ৰিয়ংকা গান্ধী
