চিৰাং, 14 জুন : বঙাইগাঁও জিলাৰ চাপৰাকাটাত 31 নং চি ৰাষ্ট্ৰীয় ঘাইপথত অঘটন ৷ ৰন্ধন গেছ কঢ়িয়াই অনা এখন টেংকাৰ দুৰ্ঘটনাগ্ৰস্থ হোৱাৰ ফলত ৰাষ্ট্ৰীয় ঘাইপথ বন্ধ কৰি দিয়ে আৰক্ষীয়ে ৷ দৰাচলতে টেংকাৰখনৰ পৰা গেছ নিৰ্গত হোৱাত এইদৰে ৰাষ্ট্ৰীয় ঘাইপথ বন্ধ কৰি দিবলগীয়া হয় ৷ ঘটনাস্থলীত বঙাইগাঁও শোধনাগাৰৰ পৰা বিশেষজ্ঞ গৈ চোৱাচিতা অব্যাহত ৰাখিছে ।
বঙাইগাঁও চহৰৰ নাতিদূৰৰ চাপৰাকাটা উৰনীয়া সেতুৰ ওচৰতে দূৰ্ঘটনাগ্ৰস্ত হয় গেছভৰ্তি টেংকাৰখন ৷ টেংকাৰখন বাগৰি পৰাত বহু সময় ধৰি ব্যাপক যানজঁটৰ সৃষ্টি হয় ৰাষ্ট্ৰীয় ঘাইপথটোত । টেংকাৰখনৰ চালকজনে জনায় যে যান্ত্ৰিক বিজুতিৰ বাবেই এই দুৰ্ঘটনা সংঘটিত হয় ।
দুৰ্ঘটনাগ্ৰস্ত টেংকাৰখনৰ পৰা গেছ নিৰ্গত হোৱাত অধিক আতংকিত হয় অঞ্চলবাসী । অৱশ্যে পিচত বঙাইগাঁও শোধনাগাৰৰ পৰা বিশেষজ্ঞৰ দল উপস্থিত হয় আৰু অগ্নিনিৰ্বাপক বাহিনীৰ লোকে জুই বিপয়ি নপৰিবলৈ চেষ্টা অব্যাহত ৰাখিছে ৷
লগতে পঢ়কঃ ঘৰলৈ যাবলৈ দিয়া হ'ল সুস্থ হৈ উঠা তিনি কোভিড-19 ৰোগীক
