বৰপেটাৰোড, 15 জুনঃ সোমবাৰে কেৰালাৰ পৰা বিশেষ শ্ৰমিক ৰে'লযোগে অসমলৈ আহি থকাৰ সময়তে, প্ৰসৱ বেদনাত ছটফটাই থকা মহিলা এগৰাকীয়ে ৰে'লৰ দবাতে এটি কন্যা সন্তান জন্ম দিয়ে ৷ মহিলাগৰাকীৰ ঘৰ গোলাঘাটৰ মেৰাপানীত বুলি জানিব পৰা গৈছে ৷ পুৱা ৰে'লখন বৰপেটাৰোড ৰে'লৱে ষ্টেচনত উপস্থিত হোৱাৰ পিচতে অকলশৰীয়াকৈ থকা মহিলাগৰাকীক, ষ্টেচন কৰ্তৃপক্ষই ১০৮ এম্বুলেঞ্চেৰে বৰপেটাৰোডৰ চিকিৎসালয়ত ভৰ্তি কৰায় ৷
সম্প্ৰতি সদ্যজাত শিশুটিসহ মহিলা গৰাকী সুস্থ অৱস্থাত আছে বুলি জানিবলৈ দিয়ে চিকিৎসালয় কৰ্তৃপক্ষই ৷ মহিলা গৰাকী স্বামীসহ কেৰালাৰ এটা টাইলছ কোম্পানীত কৰ্মৰত আছিল ৷ লক্ ডাউনৰ পূৰ্বেই মহিলা গৰাকীৰ স্বামী বিশেষ কামৰ বাবে নিজ গৃহলৈ আহি ঘূৰি যাব পৰা নাছিল ৷ সেয়ে গৰ্ভৱতী নিমা চেতিয়া নামৰ মহিলাগৰাকীয়ো বিগত শুকুৰবাৰে অকলেই শ্ৰমিক ৰে'লেৰে নিজ গৃহ অভিমুখে যাত্ৰা আৰম্ভ কৰিছিল ৷ ৰে'লেৰে আহি থকা সময়তে মহিলা গৰাকীয়ে বৰপেটাৰোড ৰে'লৱে ষ্টেচনত ৰে'লৰ দবাৰ ভিচৰতে সন্তানটি প্ৰসৱ কৰে ৷
