মৰাণ,২৫ ডিচেম্বৰ : ৰাজ্যত চলি থকা অবৈধ কাৰ্যকলাপৰ বিৰুদ্ধে বিভিন্ন সময়ত কঠোৰ স্থিতি গ্ৰহণ কৰিছে অসমৰ মুখ্যমন্ত্ৰী ড০ হিমন্ত বিশ্ব শৰ্মাই । অবৈধ কাৰ্যকলাপ বন্ধ কৰাৰ বাবে ইতিমধ্যে বিভিন্ন ধৰণৰ নিৰ্দেশনাও জাৰি কৰিছে ৰাজ্য চৰকাৰে । কিন্তু মুখ্যমন্ত্ৰীগৰাকীৰ এনে কঠোৰ স্থিতিৰ মাজতো ৰাজ্যত একাংশ দুষ্টচক্ৰই অবৈধ কাৰ্যকলাপ অব্যাহত ৰাখিছে । বিভিন্ন স্থানত পাহাৰ ধ্বংসৰ লগতে একাংশ লোকে অবৈধ শিল খননত জড়িত হোৱা দেখা গৈছে ।
বন বিভাগৰ চকুৰ সন্মুখতে এনে কাৰ্যকলাপ অসমৰ ভিন্ন প্ৰান্তৰ লগতে চৰাইদেউ জিলাতো অব্যাহত আছে । অভিযোগ অনুসৰি বন বিভাগৰ বিষয়া-কৰ্মচাৰীক মেনেজ কৰি একাংশ শিল মাফিয়াই চৰাইদেউ জিলাত অবাধে চলাইছে শিলৰ ৰমৰমীয়া বেহা (Illegal stone mining at Charaideo)। বৰহাট আঞ্চলিক বন বিষয়া কাৰ্যালয়ৰ অন্তৰ্গত পাণবাৰী আৰু দিল্লীঘাটত নীতি বহিৰ্ভূতভাৱে দিনে-নিশাই চলিছে শিল খনন কাৰ্য ।
পাণবাৰী খণ্ড বন বিষয়াৰ অধীনস্থ পাণবাৰী অঞ্চলত একাংশ অনুজ্ঞাপত্ৰহীন শিল মাফিয়াই এক্সেভেটৰ ব্যৱহাৰ কৰি দৈনিক শতাধিক ডাম্পাৰেৰে শিলৰ সৰবৰাহ অব্যাহত ৰাখিছে । আনহাতে দিল্লীঘাট খণ্ড বন বিভাগৰ অধীনস্থ দিল্লীঘাট দলঙৰ মাত্ৰ দুশ মিটাৰ আঁতৰত নদীৰ বুকুতো অব্যাহত আছে শিলৰ অবৈধ খনন । ফলত অঞ্চলটোলৈ নামি আহিছে অশনি সংকেত ।
যাৰ বাবে চিন্তিত হৈছে সচেতন মহল । সচেতন মহলৰ প্ৰশ্ন বন আইন উলংঘা কৰি এনেদৰে শিলৰ অবৈধ খনন অব্যাহত ৰখা শিল মাফিয়াৰ বিৰুদ্ধে ব্যৱস্থা গ্ৰহণ কৰিব নে প্ৰশাসনে ? শিল মাফিয়াৰ লগত গোপন মিতিৰালি কৰা বিষয়া-কৰ্মচাৰীৰ বিৰুদ্ধে বিভাগীয় কৰ্তৃপক্ষই কি ব্যৱস্থা গ্ৰহণ কৰিব সেয়া কিন্তু সময়তহে লক্ষণীয় হ'ব ।
লগতে পঢ়ক :Four arrested with fake gold : নকল সোণৰ লেন-দেনেৰে ৰঙাঘৰৰ আলহী চাৰিগৰাকী
