গুৱাহাটী, 20 জুনঃ মহা অম্বুবাচীলৈ মাজত মাথো কেইটামান ঘন্টা বাকী । নীলাচলত নিৰাপত্তাৰ ক্ষেত্ৰত সষ্টম হৈ পৰিছে আৰক্ষী প্ৰশাসন । বৃহস্পতিবাৰে কামাখ্যা ধামত এক গুৰুত্বপূৰ্ণ বৈঠকত মিলিত হয় আৰক্ষীৰ শীৰ্ষ বিষয়াসকল । মেলাৰ সময়চোৱাত যাতে কোনো অঘটন সংঘটিত নহয় তাৰ বাবে সকলোকে সষ্টম হৈ থাকিবলৈ নিৰ্দেশ দিছে প্ৰশাসনে ৷ আৰক্ষীৰ এই বৈঠকত উপস্থিত থাকে আৰক্ষী আয়ুক্ত দীপক কুমাৰ, যুটীয়া আৰক্ষী আয়ুক্ত দেৱৰাজ উপাধ্যায়, যানবাহন শাখাৰ পৰিদৰ্শক প্ৰশান্ত শইকীয়াকে প্ৰমুখ্য কৰি আৰক্ষীৰ সকলো বিভাগৰ শীৰ্ষ বিষয়াসকল । বুধবাৰে কামাখ্যাধামত সংঘটিত ঘটনাৰ যাতে পুনৰাবৃত্তি নহয় তাৰ বাবে এনেদৰেই জৰুৰী বৈঠকত মিলিত হয় আৰক্ষীৰ শীৰ্ষ বিষয়াসকল ।
উল্লেখ্য যে, অম্বুবাচী উপলক্ষে ইতিমধ্যেই অগণন ভক্তৰ সমাগম ঘটিছে মা কামাখ্যা ধামত আৰু বিভিন্ন বেশ-ভূষাৰ বাবাসকলো আহি উপস্থিত হৈছে কামাখ্যা মন্দিৰত । পুৰুষ মহিলাৰ বাবে বেলেগ শাৰীৰ ব্যৱস্থা কৰাৰ লগতে স্থাপন কৰা হৈছে মেটেল ডিটেক্টৰ । তাৰোপৰি ভক্তৰ সুবিধাৰ বাবে ঠায়ে ঠায়ে পানী যোগান, তথ্য সংগ্ৰহৰ কেন্দ্ৰও স্থাপন কৰা হৈছে । মুঠৰ ওপৰত অম্বুবাচী মেলাৰ সকলো প্ৰস্তুতি সম্পূৰ্ণ কৰিছে আৰক্ষী, প্ৰশাসনৰ লগতে মন্দিৰ পৰিচালনা সমিতিয়ে ।
লগতে পঢ়কঃ কামাখ্যা ধামত উদ্ধাৰ মুণ্ডহীন মৃতদেহঃ হত্যাকাণ্ড নে নৰবলি !!
