গুৱাহাটী, ৩০ এপ্ৰিলঃ গুৱাহাটী প্ৰেছ ক্লাৱত মঙলবাৰে সদৌ অসম অনুসূচীত জাতি ছাত্ৰ সন্থাই এক সংবাদমেলৰ আয়োজন কৰে । সংবাদ মেলত নৱম আৰু দশম শ্ৰেণীৰ বাবে প্ৰচলিত "বৈচিত্ৰময় অসম" শীৰ্ষক পাঠ্যপুথিক লৈ অসন্তুষ্টি প্ৰকাশ কৰে ছাত্ৰ সন্থাটোৱে । সন্থাটোৱে অসমৰ ভূমিপুত্ৰ সকলক উপেক্ষিত কৰা বুলি মন্তব্য কৰাৰ লগতে পাঠ্যপুথিত কৈৱৰ্ত, বণিয়া, হীৰা, সূত্ৰধাৰ, মালীসকলক চূড়ান্তভাৱে অৱমাননা কৰা হৈছে বুলি দাবী উত্থাপন কৰে । তেওঁলোকে মন্তব্য কৰে যে, মুখ্যমন্ত্ৰী সৰ্বানন্দ সোণোৱালে বৰাক-ব্ৰহ্মপুত্ৰ,পাহাৰ - ভৈয়ামৰ সকলো শ্ৰেণীৰ মানুহক সমমর্যাদা প্ৰদানৰ যি ভাষণ দিয়ে সেয়া কেৱল ৰাজনীতিৰ স্বাৰ্থতহে বুলি কয় । শিক্ষা বিভাগৰ দায়িত্বত থকা সিদ্ধাৰ্থ ভট্টাচাৰ্যইও কৈৱৰ্ত সকলৰ ইতিহাস কিতাপখনত উল্লেখ নকৰাৰ লগতে ভূপেন হাজৰিকাৰ এটা লিখনিয়ো পাঠ্যপুথিত অন্তৰ্ভুক্ত নকৰিলে বুলি সন্থাৰ সদস্যসকলে দুখ প্ৰকাশ কৰে ।
অসমৰ সামাজিক জীৱনৰ প্ৰতিটো ঘটনাতে ওতপ্ৰোতভাৱে জড়িত থকা অনুসূচীত জাতিৰ লোকসকলক পাঠ্যপুথি খনত কিয় উপেক্ষা কৰা হ'ল বুলি সন্থাৰ সদস্যসকলে প্ৰশ্ন কৰে। 15 দিনৰ সময়সূচী প্ৰদান কৰি পাঠ্যপুথিখনত এইসকল লোকৰ ইতিহাস সংযুক্ত কৰিবলৈ আহ্বান জনোৱা হয় শিক্ষা বিভাগক। লগতে সদৌ অসম অনুসূচীত জাতি ছাত্ৰ সন্থাৰ সাধাৰণ সম্পাদক দেৱ কুমাৰ দাসে হুংকাৰ দি কয় যে, চৰকাৰে কোনো ব্যৱস্থা গ্ৰহণ নকৰিলে তেওঁলোকে অনাগত দিনত আন্দোলনৰ কাৰ্যসূচী গ্ৰহণ কৰিব ।
