শিলচৰ,17 অক্টোবৰ : বুধবাৰে নিশা শিলচৰৰ চহৰৰ তাৰাপুৰ অসমীয়া বস্তিত সৃষ্টি হয় উত্তপ্ত পৰিস্থিতিৰ ৷ উত্তেজিত ৰাইজে আৰক্ষীৰ লোকক পহুখেদা দিয়াৰ লগতে আৰক্ষীৰ বাহন ভাঙি চুৰমাৰ কৰে ৷
প্ৰাপ্ত তথ্য অনুসৰি,বিগত কেইবাদিন পূৰ্বে তাৰাপুৰৰ অসমীয়া বস্তিৰ এখন ম'বাইল দোকানত চুৰিকাণ্ড সংঘটিত হৈছিল ৷ চোৰে দোকানখনৰ পৰা লুটি লৈছিল কেইবা লক্ষাধিক টকাৰ ম'বাইল ৷ ভুক্তভোগী দোকানীজনে চুৰিকাণ্ড সন্দৰ্ভত তাৰাপুৰ আৰক্ষী চকীত এখন এজাহাৰ দাখিল কৰাৰ লগতে চি চি টিভি ফুটেজো দাখিল কৰিছিল ৷ ইয়াৰ পাচতো চোৰটোক কৰায়ত্ত কৰাত ব্যৰ্থ হয় আৰক্ষী ৷
বুধবাৰে সন্ধিয়া স্থানীয় ৰাইজে চোৰটোক প্ৰত্যক্ষ কৰি উত্তম-মধ্যম সোধাই আবদ্ধ কৰি ৰাখে ৷ এই ঘটনাৰ খবৰ পোৱা মাত্ৰকে ঘটনাস্থলীত উপস্থিত হয় আৰক্ষীৰ লোক ৷ তাৰপিচতে ক্ষুব্ধ ৰাইজে আৰক্ষীৰ লোকক পহুখেদা দিয়াৰ লগতে আৰক্ষীৰ বাহন ভাঙি চূৰমাৰ কৰে ৷ অৱশেষত ঘটনাস্থলীত অসম আৰক্ষীৰ বৃহৎ দল এটা উপস্থিত হৈ পৰিস্থিতি নিয়ন্ত্ৰণ কৰাৰ লগতে চোৰটোক ৰাইজৰ কবলৰ পৰা উদ্ধাৰ কৰে ৷ এই ঘটনাক লৈ উত্তেজনা অব্যাহত আছে অঞ্চলটোত ৷
