শিলচৰ, 1 জুনঃ শিলচৰৰ শ্ৰীকোনাত ভয়ংকৰ ভূমিস্খলনৰ ঘটনা সংঘটিত হয় ৷ ভূমিস্খলনত আহত হয় পৰিয়ালৰ দুজন লোক ৷ সমগ্ৰ ৰাজ্যৰ লগতে শিলচৰতো দীৰ্ঘ দিনে নেৰা- নেপেৰা বৰষুণ ৷ ফলত ইতিমধ্যে ৰাজ্যখনৰ বিভিন্ন জিলাত ভয়ংকৰ বান পৰিস্থিতিৰ সৃষ্টি হৈছে ৷ ঠিক একেদৰে শিলচৰতো নেৰা-নেপেৰা বৰষুণৰ ফলত শিলচৰৰ শ্ৰীকোনাৰ বাংলাঘাটত সোমবাৰে ৰাতিপুৱা ভয়ংকৰ ভূমিস্খলনৰ ঘটনা সংঘটিত হয় । সমৰ দত্ত নামৰ লোকজনৰ ঘৰৰ ওপৰত পাহাৰৰ মাটি খহি পৰে । উক্ত ঘটনাটোত কথমপি প্ৰাণ ৰক্ষা পৰে পৰিয়ালটো যদিও আহত হয় দুজনকৈ লোক । আহত লোক দুজনৰ নাম সমৰ দত্ত,আৰু প্ৰদীপ দত্ত বুলি জানিবলৈ পোৱা গৈছে । এই ঘটনাটোত বিস্তৰ ক্ষতি সাধন হৈছে পৰিয়ালটোৰ ঘৰখন । পৰিয়ালটো ঘৰৰ ভিতৰত সোমাই থকা অৱস্থাতেই সংঘটিত হয় ঘটনাটো।
অৱশ্যে ঘটনাটোত কথমপি পৰিয়ালৰ সকলো লোক ৰক্ষা পৰে ৷ তাৰোপৰি আন দুজন লোকৰ ঘৰতো ভূমিস্খলনত পৰিয়াল কেইটাৰ বিস্তৰ ক্ষতি সাধন হয় ৷ উক্ত ঘটনাটো স্থানীয় ৰাইজে ততালিকে প্ৰশাসনৰ লোকক অৱগত কৰে যদিও ঘটনাস্থলীত এতিয়ালৈ কোনো এজন জিলা প্ৰশাসনৰ লোক উপস্থিত নোহোৱা বুলি অভিযোগ কৰে স্থানীয় ৰাইজে ৷
লগতে পঢ়ক- জৰাসৰ নৈৰ গৰাখহনীয়াত জাহ গ'ল বিশাল কৃষিভূমি
