ডিমা হাছাও, 26 মে' : ব্যক্তিগত খণ্ডৰ বিদ্যালয়ৰ জয়যাত্ৰা বিপৰীতে চৰকাৰী খণ্ডৰ বিদ্যালয়ৰ তথৈবচ ফলাফলে উদঙাইছে চৰকাৰী খণ্ডৰ বিদ্যালয়ৰ পঁয়ালগা স্বৰূপ ৷ সদ্যঘোষিত হাইস্কুল শিক্ষান্ত পৰীক্ষাত ডিমা হাছাওৰ ১৪ খন চৰকাৰী বিদ্যালয়ৰ ফলাফলত প্ৰকাশ পাইছে চৰকাৰী বিদ্যালয়ৰ দুখলগা ছবি ৷ জিলাখনৰ 20 খন চৰকাৰী খণ্ডৰ বিদ্যালয়ৰ ১৪ খন বিদ্যালয়ৰে ফলাফল শূণ্য ৷ এগৰাকী শিক্ষাৰ্থীও উত্তীৰ্ণ নহ'ল হাইস্কুল শিক্ষান্ত পৰীক্ষাত ৷ মাত্ৰ 4 খন বিদ্যালয়তহে ১০০ শতাংশ উত্তীৰ্ণ হ'ল শিক্ষাৰ্থী ৷
বিগত বৰ্ষতো হাইস্কুল শিক্ষান্ত পৰীক্ষাত জিলাখনৰ ৬ খন চৰকাৰী বিদ্যালয়ৰ ফলাফল আছিল শূণ্যৰ ঘৰত ৷ যদিও এইবেলি ইয়াৰ সংখ্যা বৃদ্ধি হৈ 14 খন বিদ্যালয়ৰে ফলাফল হৈ পৰে শূণ্য ৷
ইপিনে চৰকাৰী বিদ্যালয় এই তথৈবচ ফলাফলৰ বাবে নিৰ্বাচন আৰু বিভিন্ন কামত শিক্ষকক নিয়োগ কৰাৰ কাৰণতহে মানদণ্ড তললৈ গৈ আছে বুলি দায়সৰা মন্তব্য বিদ্যালয়ৰ পৰিদৰ্শক বীৰেন সিং ইংতিৰ । ফলাফল শূণ্য হোৱা এনে বিদ্যালয়ৰ বিৰুদ্ধে উত্তৰ কাছাৰ পাৰ্বত্য স্বায়ত্ব শাসিত পৰিষদ কৰ্তৃপক্ষৰ লগত আলোচনা কৰি কঠোৰ ব্যৱস্থা লোৱা হ'ব বুলিও মত প্ৰকাশ বীৰেন সিং ইংতিৰ ৷
