নিউজ ডেস্ক, 3 আগষ্ট : অসম-মিজোৰামৰ মাজত চলি অহা দীৰ্ঘদিনীয়া সীমা বিবাদ নিষ্পত্তিৰ বাবে ৰাজ্য চৰকাৰৰ দুগৰাকী মন্ত্ৰীক আইজললৈ (Aizawal) যোৱাৰ নিৰ্দেশ মুখ্যমন্ত্ৰী হিমন্ত বিশ্ব শৰ্মাৰ (Himanta Biswa Sarma) ৷ এই দুয়োগৰাকী মন্ত্ৰীয়ে আইজললৈ গৈ সীমা বিবাদ সমাধানৰ বাবে মিজোৰামৰ সৈতে আলোচনাত মিলিত হ’ব ৷ মন্ত্ৰী অশোক সিংঘাল আৰু অতুল বৰাক প্ৰেৰণ কৰা হৈছে আইজললৈ ৷
মুখ্যমন্ত্ৰী ড৹ হিমন্ত বিশ্ব শৰ্মাই টুইটযোগে ‘শান্তি বাৰ্তা’ (Peace Message) প্ৰেৰণ কৰি কয়, "মই মোৰ কেবিনেটৰ দুগৰাকী মন্ত্ৰী অতুল বৰা আৰু অশোক সিংঘালক অৰ্থপূৰ্ণ আলোচনাত মিলিত হোৱাৰ বাবে প্ৰেৰণ কৰিছো ৷ অসমে ইয়াৰ সীমান্তত শান্তি প্ৰতিষ্ঠা কৰাৰ লগতে শান্তিপূৰ্ণ উত্তৰ-পূৱ প্ৰতিষ্ঠা কৰাৰ বাবে প্ৰতিশ্ৰুতিবদ্ধ ৷"
মিজোৰামৰ মুখ্যমন্ত্ৰী জোৰামাথাংগায়ো (Zoramthanga) সীমন্তত অব্যাহত উত্তেজনা কিছু শান্ত কৰাৰ উদ্দেশ্যে মিজোৰাম আৰক্ষীক মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে ৰুজু কৰা গোচৰ উঠাই ল’বলৈ নিৰ্দেশ প্ৰদান কৰিছে ৷ সোমবাৰে অসম আৰক্ষীয়েও মুখ্যমন্ত্ৰী হিমন্ত বিশ্ব শৰ্মাৰ নিৰ্দেশ মৰ্মে মিজোৰামৰ সাংসদ কে ভানলালভেনাৰ (K Vanlalvena) লগতে মিজোৰামৰ দুগৰাকী শীৰ্ষ বিষয়াৰ বিৰুদ্ধে ৰুজু কৰা গোচৰ উঠাই লয় ৷
লগতে পঢ়ক- অসম-মিজোৰামৰ সমস্যা সমাধানৰ বাবে গৃহমন্ত্ৰীয়ে চেষ্টা কৰি আছে: মিজোৰামৰ ৰাজ্যপাল
মিজোৰামৰ ৰাজ্যপাল কে হৰি বাবু (K Hari Babu) আৰু উত্তৰ-পূৱৰ বিজেপি সাংসদসকলে প্ৰধানমন্ত্ৰী মোডীৰ সৈতে সীমা বিবাদ সন্দৰ্ভত আলোচনাত মিলিত হোৱাৰ পিছতে এই সমস্যা সমাধানৰ ক্ষেত্ৰত কিছু আশা দেখা গৈছে ৷ সোমবাৰে কেন্দ্ৰীয় মন্ত্ৰী কিৰেণ ৰিজিজু, সৰ্বানন্দ সোণোৱালৰ লগতে অসমৰ বিজেপি সাংসদসকলে সদনত প্ৰধানমন্ত্ৰীৰে বৈঠকত মিলিত হয় ৷ এই বৈঠকৰ অন্তত সাংসদকলে প্ৰধানমন্ত্ৰী 4 পৃষ্ঠাৰ এখন স্মাৰক পত্ৰ প্ৰদান কৰে ৷
এই বৈঠকৰ পিছতে কেন্দ্ৰীয় মন্ত্ৰী কিৰেণ ৰিজিজুৱে কয় যে "বৈদেশিক শক্তিসমূহে এই ক্ষেত্ৰত ইন্ধন যোগাইছে ৷ " তেওঁ লগতে কয় যে, ‘কেন্দ্ৰীয় গৃহমন্ত্ৰী গৰাকীয়ে এই সমস্যাৰ সমাধানৰ বাবে চিন্তা চৰ্চা কৰি আছে ৷ ইয়াৰ উপৰিও দুয়ো ৰাজ্যৰ মুখ্যমন্ত্ৰীয়ে সীমান্তত শান্তি প্ৰতিষ্ঠা হ’ব বুলি আশ্বাস প্ৰদান কৰিছে ৷’
26 জুলাইত কাছৰৰ লাইলাপুৰত অসম-মিজোৰাম সীমান্তত (Assam Mizoram Border) সংঘটিত ঘটনাৰ পিছতে স্থানীয় সংগঠনসমূহে মিজোৰামৰ বিৰুদ্ধে অৰ্থনৈতিক অৱৰোধ ঘোষণা কৰে ৷ ইয়াৰ বাবে আতংকিত একাংশ ট্ৰাক ড্ৰাইভাৰে কাছাৰৰ ধলাই জিলাত বাহনসমূহ ৰখাই থোৱাৰ বিপৰীতে আন একাংশই ত্ৰিপুৰা হৈ মিজোৰামত প্ৰৱেশ কৰিছে ৷
উল্লেখ্য যে, অসমৰ কাছাৰ, হাইলাকান্দি আৰু কৰিমগঞ্জৰ সৈতে মিজোৰামে প্ৰায় 164.6 কিলোমিটাৰ সীমান্ত সংযুক্ত হৈ আছে ৷ কিন্তু দুয়ো ৰাজ্যই সীমান্তক লৈ নিজ নিজ বাখ্যা আগবঢ়ায় ৷ মিজোৰামে দাবী কৰে যে, 1875 চনতে তেওঁলোকৰ জনগোষ্ঠীয় লোকসকলক সুৰক্ষা প্ৰদান কৰাৰ বাবে এক সীমান্ত ৰেখাৰ লগতে আন্তঃৰাজ্যিক ৰেখা অংকণ কৰা হৈছিল ৷ ইয়াৰ বিপৰীতে অসমে 1930ৰ জিলা সীমা নিৰ্ধাৰণৰ কথা দাবী কৰে ৷
লগতে পঢ়ক- অসম-মিজোৰাম সীমা বিবাদঃ অসমৰ সাংসদৰে বৈঠক প্ৰধানমন্ত্ৰী নৰেন্দ্ৰ মোডীৰ
