মৰাণ,উত্তৰ অভয়াপুৰী, ৩০ মাৰ্চ : কেন্দ্ৰীয় চৰকাৰে সমগ্ৰ দেশজুৰি কৰ'ণা ভাইৰাছৰ বিৰুদ্ধে যুঁজিবলৈ ঘোষণা কৰা লক্ ডাউনৰ ফলত মৰাণৰ দিহিং নদীৰ পাৰত অৱস্থিত দিহিঙৰ চাপৰিত এতিয়া কৃষকৰ চকুত চকুপানী । অশেষ পৰিশ্ৰম কৰি অঞ্চলটোৰ কেইবাগৰাকী কৃষকে বেঙেনা, জলকীয়া,ভেকুৰি বেঙেনা আদি বিবিধ পাচলিৰ খেতি কৰিছিল যদিও লক্ ডাউনৰ বাবে বিঘাই বিঘাই পাচলি গছতে নষ্ট হ'বলৈ ধৰিছে । বজাৰ বন্ধ হোৱাত কৃষকে ফচল সমূহ পেলাই দিব লগীয়া হৈছে আৰু যাৰ বাবে কৃষক সকলৰ লাখ লাখ টকা ক্ষতি হৈছে । বেংকৰ পৰা কৃষি ঋণ লৈ খেতি কৰা খেতিয়ক সকলে বেংকৰ ঋণ পৰিশোধ কৰিবলৈ চিন্তা কৰিব লগা হৈছে । অঞ্চলটোৰ কৃষকসকলে বিভাগীয় বিষয়া কৰ্মচাৰীক কৃষিভূমি পৰিদৰ্শন কৰিবলৈ আহ্বান জনোৱাৰ লগতে সাহায্য প্ৰদান কৰিবলৈও চৰকাৰক দাবী জনাইছে ।
আনহাতে, কৰ'ণাৰ আতংক আৰু লক্ ডাউনৰ বাবে উত্তৰ অভয়াপুৰীতো খেতিতেই পচিবলৈ ধৰিছে পাচলি । যাৰ বাবে মূৰে-কপালে হাত দিছে কৃষকে । বঙাইগাঁও জিলাৰ সৃজনগ্ৰাম ৰাজহ চক্ৰৰ অন্তৰ্গত গোলাপাৰাত শ শ বিঘা তিতাকেৰেলা নষ্ট হৈছে বজাৰৰ অভাৱত । প্ৰতি বিঘা খেতিত খৰচ ৩০ হাজাৰকৈ টকা খৰচ কৰি উৎপাদন কৰা তিতাকেৰেলা সম্প্ৰতি কৰ'ণাৰ আতংকৰ ফলত চলি থকা লক্ ডাউনৰ বাবে কৃষকে বিক্ৰী কৰিব নোৱাৰাত এতিয়া হাহাকাৰ অৱস্থাৰ সৃষ্টি হৈছে । হাট-বজাৰ, যান-বাহন সকলো বন্ধ হৈ থকাৰ বাবে উৎপাদিত সামগ্ৰী বিক্ৰী কৰিব পৰা নাই কৃষকে । কৃষকসকলে লক্ ডাউনৰ প্ৰতি পূৰ্ণ সমৰ্থন আগবঢ়াইছে যদিও তেওঁলোকে চৰকাৰ তথা জিলা প্ৰশাসনক তিতাকেৰেলাবোৰ বিক্ৰীৰ কিবা এটা ব্যৱস্থা কৰিবলৈ দাবী জনাইছে ।
