বঙাইগাঁৱত সৰ্প দংশনত মহিলাৰ মৃত্যু

পাতিলাদহাত সৰ্প দংশনত মহিলাৰ মৃত্যু। ফেটি সাপে দংশন কৰাৰ সন্দেহ ৰাইজৰ। বেজৰ বেজালিত কৰুণ মৃত্যুক আঁকোৱালি লোৱাৰ অভিযোগ সচেতন ৰাইজৰ।

বঙাইগাঁও, 1 মেঃ বঙাইগাঁৱৰ পাতিলাদহা বাওবাৰীত ফেটী সাপৰ দংশন মৃত্যু হয় এগৰাকী মহিলাৰ। খবৰ অনুসৰি, দুপৰীয়া আহাৰ গ্ৰহণ কৰি পথাৰত গৰু চৰাবলৈ যাওঁতে বাওঁ ভৰিত সাপে দংশন কৰে। লগে লগে প্ৰত্যক্ষদৰ্শীয়ে ভৰিত বান্ধ দি বঙাইগাঁৱৰ চকিহালী পাৰেয়াপাৰা গাঁৱৰ নিতাই দাস নামৰ বেজ গৰাকীৰ ওচৰলৈ লৈ যায়। বেজে জৰা-ফুকা কৰি সাপৰ বিষ নামিছে বুলি কৈ ভৰিৰ বান্ধ খুলি দিয়াৰ পাচতে অচেতন হৈ পৰে মহিলা গৰাকী। পাচত মাণিকপুৰ মহত্মাগান্ধী আদৰ্শ চিকিৎসালয়ত ভৰ্তি কৰায় যদিও চিকিৎসকে মৃত বুলি ঘোষণা কৰে মহিলাগৰাকীক ।

উল্লেখ্য যে, বিগত বৰ্ষতো মহিলা গৰাকী আৰু তেখেতৰ কন্যাক সাপে দংশন কৰে ৷ দংশনত মহিলাগৰাকীৰ কন্যাৰ মৃত্যু হয় যদিও সৌভাগ্যক্ৰমে মৃত্যুৰ পৰা ৰক্ষা পৰে মহিলাগৰাকী ৷ আনহাতে, একাংশ স্থানীয় সচেতন নাগৰিকে বেজৰ এই নাৰকীয় কাণ্ডক ধিক্কাৰ দি বেজৰ বিৰুদ্ধে বিহিত ব্যৱস্থা ল'বলৈ প্ৰশাসনক দাবী জনায়।