বঙাইগাঁও,3 মাৰ্চঃ কৰ্মৰ প্ৰতি অনিহাই বৰ্তমান সময়ত এচামক ভাৰাক্ৰান্ত কৰি তোলাৰ মাজতে বঙাইগাঁৱত ব্যতিক্ৰমী পদক্ষেপ গ্ৰহণ কৰিছে এচাম যুৱকে । সময়ৰ সদব্যৱহাৰ কৰি বঙাইগাঁও জিলাৰ শাওনাগাঁৱত উজলি উঠিছে কেইগৰাকীমান টেট শিক্ষক । পেচাত শিক্ষক হ’লেয়ো খেতিপথাৰত পূৰ্ণ উদ্যমেৰে লাগি পৰিছে শিক্ষক কেইগৰাকীৰ লগতে আন কেইবাজনো লোক ।
শাওনাগাঁও তথা নিকটৱৰ্তী অঞ্চলৰ বেদব্ৰত সিংহ, ধনেশ ৰায়, সুশীল ৰায়, নৱজিৎ গগৈ, থীৰেন বৰ্মণ, প্ৰবীৰ ৰায়, ৰাজকুমাৰ দেৱ আৰু ডিম্বেশ্বৰ বৰ্মন নামৰ যুৱক কেইজনে সম্পূৰ্ণ জৈৱিক প্ৰক্ৰিয়াৰে খেতি কৰি আহিছে । নৱোদয় অৰ্গেনিক ফাৰ্ম নামেৰে এখন কৃষিপাম খুলি বিগত বৰ্ষত শাওনাগাঁৱত আঢ়ৈ বিঘা মাটিত কৰি আহিছে বিভিন্ন খেতি । তাৰ ভিতৰত দলটোৱে কৰা ষ্ট্ৰবেৰীৰ খেতিয়ে সকলোৰে দৃষ্টি আকৰ্ষণ কৰিবলৈ সক্ষম হৈছে ৷ এইবেলি দলটোৱে ষ্ট্ৰবেৰীৰ লগতে ইলাচী, বেঙেনা, বিলাহী আদিৰো খেতি কৰাৰ ব্যৱস্থা কৰিছে ৷
উল্লেখ্য যে,বৰ্তমান সমাজৰ যুৱ চামক চাকৰিৰ পিচত দৌৰি সময় নষ্ট নকৰি খেতিপথাৰত নামি নিজকে স্বাৱলম্বী কৰি গঢ়ি তোলাৰ বাবে আহ্বান জনায় এইসকল উদ্যমী শিক্ষক তথা কৃষকে ।
লগতে চাওকঃডিব্ৰুগড়ত দেশৰ দ্বিতীয় বৃহৎ মন্দিৰটো!
