বঙাইগাঁও, ৫ ফেব্ৰুৱাৰী: পেট্ৰ'ল, ডিজেলৰ মূল্যবৃদ্ধিৰ লগতে অত্যাৱশ্যকীয় সামগ্ৰীৰ মূল্যবৃদ্ধি ৰোধ কৰাৰ দাবীত শুকুৰবাৰে ৰাজ্যজুৰি এক প্ৰতিবাদী কাৰ্যসূচী গ্ৰহণ কৰে অসম জাতীয়তাবাদী যুৱ-ছাত্ৰ পৰিষদে । ৰাজ্যজোৰা এই প্ৰতিবাদৰ লগত সংগতি ৰাখি অসম জাতীয়তাবাদী যুৱ ছাত্ৰ পৰিষদৰ বঙাইগাঁও জিলা সমিতিয়ে বঙাইগাঁৱৰ ৰাজপথত তীব্ৰ প্ৰতিবাদী কাৰ্যসূচী ৰূপায়ন কৰে ।
প্ৰতিবাদস্থলীত প্ৰধানমন্ত্ৰী, পেট্ৰ'লিয়াম মন্ত্ৰী আৰু অসমৰ মুখ্যমন্ত্ৰীৰ প্ৰতিকৃতি দাহ কৰি শীঘ্ৰেই পেট্ৰ'লজাত সামগ্ৰীৰ মূল্য নিয়ন্ত্ৰণ কৰিবলৈ দাবী জনায় ছাত্ৰ সংগঠনটোৰ কৰ্মীসকলে ৷ কেন্দ্ৰীয় আৰু ৰাজ্য চৰকাৰে এই মূল্যবৃদ্ধি ৰোধ কৰিবলৈ বিফল হোৱা বুলি মন্তব্য কৰে ছাত্র সংগঠনটোৱে । উল্লেখ্য যে, ৰাজ্যত বিগত কেইবাদিন ধৰি অভাৱনীয় হাৰত বৃদ্ধি পাইছে পেট্ৰ'লজাত সামগ্ৰীৰ মূল্য ৷
