বিশ্বনাথ, 21 ছেপ্তেম্বৰ : গহপুৰত সোমবাৰে শ্বহীদ দিৱস(Swahid Divas) পালন ৰাজ্যিক বিজেপি(BJP)ৰ ৷ গহপুৰৰ বিভিন্ন স্থানত শ্বহীদ বীৰাংগনা কনকলতা বৰুৱা আৰু মুকুন্দ কাকতিক স্মৰণ কৰি পালন কৰা হয় শ্বহীদ দিৱস ৷
ইফালে গহপুৰৰ কনকলতা ভৱনত অনুষ্ঠিত হোৱা বিজেপিৰ শ্বহীদ দিৱস কাৰ্যসূচীত উপস্থিত থাকে অসম ৰাজ্যিক বিজেপিৰ সভাপতি ভৱেশ কলিতা, মন্ত্ৰী ৰঞ্জিত ডেকা আৰু বিজেপি মহিলা মৰ্চাৰ ৰাজ্যিক সভানেত্ৰী আঙুৰলতা ডেকা । প্ৰথমে ঘাঁহিগাৱত উপস্থিত হৈ শ্বহীদ মুকুন্দ কাকতিক স্মৰণ কৰি তাৰপাচত বৰঙাবাৰীৰ কনকলতা বৰুৱাৰ সমাধিস্থলত পুষ্পাঞ্জলি অৰ্পণ কৰে বিজেপিৰ নেতা-কৰ্মীসকলে ৷
এই দিনটোতেই ভাৰত ত্যাগ আন্দোলন(Quit India Movement)ত জাতীয় পতাকা উৰুৱাবলৈ গৈ ব্ৰিটিছৰ হাতত প্ৰাণ আহুতি দিবলগীয়া হৈছিল গহপুৰৰ কনকলতা বৰুৱা আৰু মুকুন্দ কাকতিয়ে ৷ দেশৰ হকে প্ৰাণ ত্যাগ কৰা শ্বহীদ দুগৰাকীক শ্ৰদ্ধাৰে সুঁৱৰিছে গহপুৰবাসীৰ লগতে সমগ্ৰ অসমবাসীয়ে ৷
