বিশ্বনাথ,২ আগষ্ট: বিশ্বনাথত আয়ুষ্মান কাৰ্ড বনোৱাৰ নামত ধন সংগ্ৰহ কৰাৰ অভিযোগত দুজন কৰ্মচাৰীক আটক কৰে আৰক্ষীয়ে । কাম বন্ধ ৰখাৰ পাছতো এটা কোম্পানীৰ দুজন কৰ্মচাৰীয়ে ধন সংগ্ৰহৰ লক্ষ্যৰে বিশ্বনাথৰ ভিৰগাঁৱত কাম চলাই আছিল(Corruption in making Ayushmann Cards) ।
জানিব পৰা মতে, জেফৰ নামৰ কোম্পানীটোৱে আয়ুষ্মান কাৰ্ডৰ কাম কৰি আছিল যদিও বিশ্বনাথ জিলাত কাম বন্ধ ৰখা হৈছিল । কিন্তু, তাৰ পিছতো বিশ্বনাথৰ উত্তৰ ভিৰগাঁৱত কাম চলাই আছিল কোম্পানীটোৱে । কোম্পানীটোত কৰ্মৰত লোকসকলে ৰাইজৰ পৰা এখন কাৰ্ড বনোৱাৰ নামত ১৫০ টকাকৈ সংগ্ৰহ অভিযোগ উত্থাপন হৈছিল (Making Ayushmann Card for Rs 150) ।
বিশ্বনাথ জিলাৰ সহকাৰী আয়ুক্ত কংকনা শইকীয়াই জানিবলৈ দিয়া অনুসৰি গাঁওৰক্ষী বাহিনীয়ে জিলা প্ৰশাসনক অৱগত কৰিছিল উত্তৰ ভিৰগাঁৱত ১৫০ টকাৰ বাবদ আয়ুষ্মান কাৰ্ড বনাই থকাৰ বিষয়ে । সেই খবৰৰ ভিত্তিতে ভিৰগাঁৱৰ নামঘৰত সোমবাৰে সহকাৰী আয়ুক্ত কংকনা শইকীয়া আৰু বিশ্বনাথ আৰক্ষীৰ এটা দল উপস্থিত হয় । আৰু উত্তৰ ভিৰগাঁৱৰ নামঘৰত আয়ুষ্মান কাৰ্ডৰ কাম চলাই থকা কোম্পানীটোত কৰ্মৰত দুজন কৰ্মচাৰীক হাতে লোতে ধৰা পেলাই । পৰৱৰ্তী সময়ত দুয়োজনকে আটক কৰি অধিক তথ্যৰ সন্ধানত জেৰা চলাই আৰক্ষীয়ে ।
লগতে পঢ়ক: KAAC awareness programme : কাৰ্বি আংলঙত গুণগত শিক্ষাৰ বাবে সজাগতা অভিযান কাৰ্যসূচী
